ZALEN, May 02, 2025: Dubai, UAE-a a inlan vawi khatnaah Laldinsanga’n hneh takin inhnek a thunun a, Ningani zan khan Cripto Fight Night-ah unanimous decision-a QuiMing Li a hneh rualin, pro boxing a khelh hnuhnun vawi liah ram dang boxer vek hmachhawnin a hneh vek.

Dinsang’n a kut vei lamah na nei chungin Ramee Dream Hotel-ah mittlung takin round riat chhung a khel tluan a, thiamna leh theihna, tuanran leh kawng hrang hrangah Chinese boxer QuiMing awpbetin round tin a la vek a, 80-72 vekin judge pathumin an chaktir.

April 25 khan a awmna khua, Lungleiah inhnekin round rukna laihawlah technical knockout-in Filipino fighter Bryan James Wild a hneh a. Zin chhuak nghalin ni ruk hnuah Dubai-ah fak hlawh takin a inhnek zui leh a, chutih laiin a kut vei lamah hliam tenau a neih avangin a ding lam a hmang nasa hle a ni.

November 30 khan kum 21 mi, Dinsanga’n Bengaluru-ah WBC Youth bantamweight title chuhin round riat an inbeih hnuah Michael Decardi Nelson (Ghana) a hneh a, kar khat pawh tling lo, December 6-ah LPS Pro Fight bantamweight title a humhim a, Aizawlah amah chotu, Omega Lalramdina hneh mah se he inhnek hi professional a ni lo ve thung.

February 25 khan Bangkok-ah technical knockout hmangin Thai boxer Sarawut Jiamthong a hneh a, pro boxing a khelh hnuhnun vawi liah ram hran boxer vek hnehin professional huanga a inhnek tawhah tlawm nei lovin tum 12 a chak zawn mek a, knockout-in vawi sarih hnehna a chang.

Kum 24 mi, QuiMing erawh pro boxing vawi 16 a khelhna niin a tum riat nan a tlawm a, vawi ruk chak tawhin mi pahnih nen an inhnehtawk a ni.

Round khatna chanve vel atangin Ramthar Veng Lunglei tlangvalin rang taka hnek chhuak zawnin a nawr a, veikhawr anga khelin a ding lamin fuh takin a dawm lut a, inven lama insawrbing, QuiMing-a kut dahna pelin a beng bulah a vai fuh fo bawk.

Round hnihnaah QuiMing chuan Dinsanga taksaah a hneksak a, Mizo boxer-in bei letin a ding lamin vawi li a dawm zawn a, a hnuai leh chungah hnek zawn zuiin an kutchhuak a inran hleih ang bawkin a intam hleih a, Chinese boxer-in a chhang let hneh lo.

Round thumna tirah Dinsanga’n a bekah a hnek nghing lawih a, vawi sawm chuang hnek zawn zuiin QuiMing a inveng seng lo. Manny Pacquiao-a vanglai ang maiin WBC Youth champion hian chi hrang hrangin a hnek chhuak tam a, QuiMing chuan tha taka hnek let nei ve thin mah se tluk pumpelh turin inveng nen hun tam zawk a hmang.

Round linaah Dinsanga’n a vei leh ding a chhuak zawn hnuah a ding lamin chiang takin a vai thle a, chawl lovin a chhaih buai zui avangin QuiMing chuan a ngilin hnek let ve mah se a langsar tham lo. Round nganaah thil awm dan a danglam lo va, QuiMing-a inhawn laiin Dinsanga'n a hnek fuh hman zel a, a tawp dawnah chiang takin Chineise bekah a hnek.

Round rukna tirah Dinsanga’n na thama a hnek fuh leh nghal avangin QuiMing a inven nasat phah a, a ding lamin a hnuaia a hnek hnuah a veiin a hnek zawn zui a, Chinese invenna pelin a beng bulah a hnek lut zawn thin bawk a, a hnek hneh hle.

Round sarihnaah hnek tluk tumin Dinsanga’n a tir minute khat chhung vel nasa leh zualin a nuai a, tuar hle chungin fei takin QuiMing a ding tluan a, a khat tawka a hnek let ve zauh zauh bak inveng chungin a tawlh kual.

Round hnuhnung berah erawh chet sual palh theih a nih avangin LPS Pro Fight champion a inthlahdul hret a, na taka nawr zui lovin awmze neiin a hnek chhuak. Chuti chungin hnek tam zawk a ni tho a, a tawp dawnah QuiMing chuan chiang takin a hnek fuh ve thung a, um zuiin rei lo te chhung Dinsanga a hnungtawlh a ni.