ZALEN May 14, 2026: Central YMA chuan Ni 13.05.2026 (Nilaini)-a Manipur Kangpokpi District-a Kotzim leh Kotlen inkara Thadou Baptist Association (TBA) Kohhran hruaitute Churachanpur-a Inkhawmpui hmang haw lam chuanna Motor lambuna mi pathum - Rev. Dr. Vumthang Sitlhou, Pastor Kaigoulun Lhouvum leh Pastor Paogoulen Sitlhou-te kahhlum an ni leh midang pali an hliam hi pawi an ti tak zet tih thuchhuah an siamah an tarlang.

Hetianga mi pawisawilo leh Sakhua hruaitute kahhlum an ni hi Central YMA chuan pawi a tiin an dem a. He thil thlenga mawhphurtute pawhin an phu ang tawk hremna an hmuh ngei theih nan sawrkar laipui pawh hma la turin an ngen a. He thil thleng hian Manipura Zofate te himna nasa taka a khawih avangin hriathiam har an ti a, Zofate leh hnam hrang hrang inkara remna leh muanna awm hi an duh tih an tarlang.

He thil thlenga thihna tawkte an sun a, an chhungte an tuarpui tak meuh a ni. Hliam te pawh dam leh thuai turin duhsakna an hlan bawk.