Aizawl; Supply Minister John Rotluangliana chuan, tunhnaia Local Council thenkhatin an area chhunga Zu zawrh khapna an puang ringawt chu MLTP Act hunlai thil leh MLPC dan hnuaiah chuan dan dodal zawnga chet lakna a nih thu a sawi a. Dan hmanga din chu dan kalh a khawsak a thiang lo a ni, a ti. Supply Minister John Rotluangliana hian Sept. ni 12 khan a bial chhung Rawpuichhip khuaa zirlai hlawhtlingte chawimawina inkhawm a hmanpuinaah he thu hi a sawi a. Education Deptt. hmalakna hnuaia sikul tan hun leh ban hun sawn hma hlawkna sawiin, zirlaite tan hunawl nilovin hunthawl lehkha zirna leh thiamna dang zirna hun an neih tur thu a sawi a. "Hunawl leh hun thawl ngaihpawlh chi a ni lo", a ni ti bawk. Mizo fa, Zoram pawna awm ten India ram leh International level thlengin Mizo hming an ti tha tawh tih sawiin, "Zoram chhunga cheng Zofaten kan entawn a ngai a ni," John Rotluangliana chuan a ti a. Chhawr hleih theih loh graduate nih chu thil zahthlak a nih thu sawiin, sorkarah ringawt luh tum lova an zirna in thiamna a pek hmanga eizawn tumna rilru put a ngai a ni, a ti.