ZALEN July 19, 2026: Mizoram sawrkar hnuaia document dik lo hmanga family pension la, hun tiam chhunga in-surrender lote chhui chhuaktu tur ‘Task Force’ din a ni a, Mizoram pum an tuam chhuak vek dawn.

ZALEN thudawn danin document dik lo hmanga family pension la, hun tiam chhunga in-surrender lote chu Task Force-in an chhui chhuak a nih chuan dan angin an chungah hremna lekkawh a ni ang.

Hetihlai hian dik tawk loa family pension la, hun tiam chhunga in-surrender-te chu ngaihnathiam/rulhtir an ni lo dawn lo thung. 

Finance department tar lan danin dan dik tawk loa family pension la in-report-na hmun tur chu mahni family pension lakna Treasury Office-ah a ni.

Finance department chuan dan dik loa family pension la, in-surrender lote chu chhui chhuah tak tak an ni dawn tih tar lang bawkin, Task Force-in an chhui dawn thu leh Mizoram pum an tuam chhuah tur thu an tar lang.

Tunah hian Mizoram sawrkar hnuaiah pension benefit dawngtu hi mi 39,954 an awm mek a, heng zingah hian superannuation pension la mek 22,139 leh family pension la mek mi 11,194 an awm a. Pension chi dang latu, Centralised Pension Processing Centre (CPPC) kaltlanga la 5,629, voluntary 594, VRS 289, invalid 69 leh compulsory mi 40 te an awm a ni.

Sawrkar chuan dik lo taka family pension latute tan mahni duhthu ngeia sawrkara pekkir (surrender)-na hun July 1 atanga September 30, 2026 chhung a hawng mek a, mi thenkhat chuan an PPO-te an pe kir tawh nia sawi a ni.

He mi hun chhunga pe kir lote dap chhuah hna hi thawh chhunzawm a ni ang a, document lem hmanga hetiang thil tih tumna hi a awm zui zel loh nan zau taka awareness kalpui a ni bawk ang.