ZALEN June 24, 2026: Vawiin khan TBC Lalvenchhunga, MLA, Adviser to CM chuan a office-ah Bharat Forge leh Confederation of Indian Industries (CII) ten Darzo khuaa tuihna tihpunna tur 'Groundwater Rejuvenation Project', Corporate Social Responsibility Fund atanga an thawh tur chu a hawng.

He CSR Project hmang hian Darzo khaw ram 1.93 Hectare a zauah ruahtui tlinna tur khur (trenches) 1000 laih tur a ni a, hna hi Young Indian Mizoram ten an thawk ang. Young Indian te hi Confederation of Indian Industries (CII) hnuaia thalai pawl an ni a. He project hi India rama Young Indian ten hetiang lam chi CSR Project an thawh hmasak ber tur a ni.

Project tlangzarna hi Alan Lalhriatpuia, Chapter Chair, Young Indians (Yi) Mizoram leh Co-Chair, CII Mizoram chuan a kaihruai a. Francis L. Khiangte, Co-Chair, Yi Mizoram chuan project chungchang hi sawifiahin, he project hian Darzo khuaa lei hnuaia tui awm tichhuak leh tura hma lak a, tui hnianghnar zawk a awm theihna atana ruahmanna leh tui hnar nghet siam te chu a tum a nih thu a sawi.

Project kalpuina dan tur chungchangah Bharat Forge Limited, CII Foundation leh Darzo Village Council President chuan inremsiamna, Memorandum of Understanding (MoU) an ziak bawk.