ZALEN June 23, 2026: Dawrpui khawtlang hruaitute Joint Action Committee chuan Chhinga Veng Thalai Pawl inti te'n an veng chhung ngeia dan pawisa loa hma an la chu mak an tiin an dem a, eng thuneihna nge an neih tih zawtin dan hnuaia inrem taka awm chu an duh ber a nih thu an sawi bawk.

Dawrpui khawtlang hruaitute Joint Action Committee chuan vawiin khan Aizawl Press Club-ah thuthar lakhawmtute an kawm a, anni chuan Chhinga Veng Thalai Pawl inti ten buaina an rawn siamna lai hi Dawrpui Area a ni a. Sawrkarin khua leh veng ramri a siam Dawrpui ramri tarlanna Gazette Vol XXIII Aizawl, Friday 29.04.1994, Vaisakha 9, S.E 1916 Issue no. 59-ah Dawrpui area a ni tih chiang taka tilangtu niin chanchinbu mite an hrilh.

Dawrpui Joint Action Committee chuan Chhinga Veng ramri tarlanna Gazette Vol X Aizawl Friday, 22.01.1982 Magha 2, S.E 1903 Issue No.6-ah Chhinga Veng area a ni lo tih chiang takin a lan thu an sawi a.

"Ni 17 June 2026-a AMC Mayor kaihhruaina hnuaia veng pahnih hruaitute inkawmhonaah pawh keini Dawrpui veng aiawha telte chuan, an laka chet dan rawva lutuk hian kan rilrua tina hle chungin dan hnuaiah veng pahnihte hi inrem dan kawng zawn a tha e kan ti a. He meeting-a Chhinga Veng aiawha telte chuan "Gazette kan pawm lo" an ti kha sawrkar thuchhuak zah lohnaah kan ngai a, buai chhunzawm zel an pawi ti loah kan ngai a ni," tiin Press Conference an neihah an sawichhuak a ni.

"Hetiang taka Dawrpui Khawtlang chunga Chhinga Veng Thalaite chet dan hian keini Dawrpui veng mipuite min zahlovin rilru a ti na takzet a. Kan ram hruaitute'n inremna beiseia min ngenna avang chauhin kan insum hram hram a. Amaherawhchu, Chhinga Veng lam hian an thil tih chhiatte siam tha leh a, kan ram china signboard an rawn tarte lak thlak an tum tak lovah chuan inrem an duh lo angah kan ngai," an ti bawk a.

A tul angin Dawrpui khawtlang chuan dan angin hma an la zel dawn tih sawiin Sawrkarin Dawrpui veng chin a siam Gazette chu inches khat pawhin an tawlh dawn lo tih Zoram mipuite'n hria se an duh thu media kaltlangin an sawi bawk a.

"Sawrkarin 1994 Gazette a chhuaha Dawrpui ram chin a siamah hian awm kan duh ber a. Veng thenawmte nen hian dan hnuaiah inrem taka awm hi kan duh ber reng chu a ni," an ti bawk.