ZALEN February 10, 2026 : Lunglei district-a Sesawm khua-a zirtirtu hnathawk, December 21, 2025 atanga a chin hriat lova bo Ngurthanmawia Sailo (30) S/o Lalliana Sailo, Farmveng Lunglei ruang chu vawiin chawhnu dar 3:00 vel khan Lunglei Ramthar huam chhung Tuilut lui kamah hmuh a ni.

Thulakna Lunglei chanchinbu hlun Ralvengtu-in a tarlan danin Ngura ruang hi Bawngchaw zawng mipakhatin Tuilut lui kamah a hmu a, a ruang hmuh a ni tih hriat velah Ramthar leh Farm veng YMA, Lunglei bakah Police te’n a tul ang ang buaipui nghalin, ruang hi chhe viau tawh mah se, a thawmhnaw hak atangin Ngura chhungte hian an finfiah thei a ni.

Ngurthanmawia ruang hi vawiin tlai vek khan Post mortem turin Lunglei Civil Hospital panpui nghal niin, zanin hian Farm Veng thlanmual-ah vui nghal a ni.

Ngura hi Lunglei District khawthlang lam Sesawm khua Primary School a zirtirtu thawk mek niin nikum December ni 21 atanga a bo hnu khan Mizo dan angin Lunglei khawpui chhung YMA Branch hrang hrangte chuan ni 7 chhung lo zawng tawhin hemi hnu hian a zawn hna hi an titawp a ni.