ZALEN June 30, 2026: MZP buatsaihin vawiin khan "Remna Ni" 2026 chu LPS Arena, Falkland-ah hman a ni a, he hunah hian Remna leh Muanna a awm theih nan a thawhhlawk Rev. Dr. CL Rema chu chawimawina hlan a ni a, Home Minister K. Sapdanga chu Khuallian niin, MZP Vice President Sanghmingthanga kaihhruainain hun hi hman a ni.

K. Sapdanga chuan Sawrkar hna lak reng rengah thianghlim takin, a tling apiangte indawtin an la zel dawn a. Tling lo zawk duhsak vanga lak na taka dodal zel a ni dawn a, chu chuan zirlaite tan kawng dik zau takin a hawng ang a, hah taka zir hi awmzia neih tir an tum thu a sawi. "Thalaite lo pen chhuak ula, dikna kawngka zau takin lo hawn zel a ni ang. Dikna kenkawh avanga tawrh a ngai a nih pawhin, thangtharte tan kan tuar zel mai ang chu," tiin zirlai pungkhawmte a fuih.

Khuallian chuan Remna atana thahnemngai taka thawktu zinga mi Rev. Dr C.L.Rema chu chawimawina a hlan a, thinlung taka lawmpui thu a sawiin, "He Remna Ni-ah hian, remna siam tura ralthuam tunga lo pen chhuak MNF-te chungah lawmthu kan sawi a, lo pen chhuahna kawng lo sialsak a, lalthuthleng kiantu Pu Lal Thanhawla inpekna kha kan chawimawi nawn leh a, Kohhran hruaitute, Mizo Zirlai Pawl leh remna atana thawktu dang zawng zawngte kan chawimawi bawk a ni," a ti.

K. Sapdanga chuan Mizoram buaina titawp tura remna thuthlung chu thuthlung tha ber pawl a ni kher lo mai thei a, remna thuthlung zawm hlawh ber zinga mi chu a ni. Hei hian Mizo hnam rinawmna tarlang a, kum 40 a tlin thlenga Remna Ni hlim tak leh lungrual taka lawm theih a ni chu a hlu tak zet a ni, a ti bawk. Khuallian hian Souvenir thlangzarhna a nei bawk a ni.

"Remna Ni" 2026 lawmnaah hian Rev. John. Raldosanga, Moderator Mizoram Synod chuan Hunserh hmangin, C. Lalhmingsanga General Secretary chuan Remna Ni lo hman tawh dan report a pe a. He Remna Ni pual hian, 1st Battalion MAP, St. Joseph HSS, St. Anthony's HSS, Endeavour School of Learning leh Home Missions School te zai leh lam hmuhnawm tak an entir bawk a ni.