ZALEN March 18, 2026 : Gas, Diesel leh Petrol-a harsatna thleng thei chungchanga district thuneitu ten tunkar leh kar liamtaa thuchhuah an siamah, Serchhip DC leh Hnahthial District Civil Supplies Officer te thuchhuah-ah chiah Myanmar lama heng tuialhthei chi ho hi hralh khap a nih thu tarlan a ni.

District thuneitute hian tun dinhmunah eirawngbawlna Gas, Petrol leh Diesel lakluh naah harsatna a awm lo thu leh chutih rualin renchem taka hmang turin an ngen a ni. Eirawngbawlna Gas chungchangah Booking tih ni atanga ni 25 (sawmhnih panga) hnuah chauh Booking hi a tih leh theih thu te an tarlang hlawm.

Eirawngbawlna Gas, Petrol leh Diesel engtik lai mahin dan phal loh a chhekkhawl emaw, a man ai to a hralh chhuah emaw hralh chhawn (Black Marketing) khap a nih thu mipui an hriattir a, Petrol leh Diesel te hi phalna nei lo chuan, Bur/Gallon/Barrel a dawh emaw chhekkhawl khap tlat a nih thu an thuchhuah-ah hian tarlan a ni hlawm.

Eirawngbawlna Gas, Petrol leh Diesel te hi Ram pawn lamah phurh/ hralh chhuah khap a nih thu hi Serchhip DC Paul L. Khuma chuan nimina a thuchhuah a siamah Myanmar leh ram dangah dan lova hralh emaw pek chhawn a khap tlat tih a tarlang a, Hnahthial District Civil Supplies Officer Dr. Michael Solo pawhin vawiina thuchhuah a siamah Eirawngbawlna Gas, Petrol leh Diesel te hi Ram pawn (i.e. Myanmar) lamah phurh/ hralh chhuah khap a nih thu a tarlang ve leh bawk.

District thuneitute hian an district in harsatna an tawh lohna turin mipui te tih tur leh tih loh tura an ngenna te an thuchhuah siamah hian an tarlang vek a ni.