ZALEN July 15, 2026: Finance Department chuan dan dik lo va Family Pension la ten an Pension Payment Order sorkara pe kir tura hmalakna bultanna Statewide Kick-off Programme on 'Sensitization of Voluntary Surrender of Pension Payment Order (PPO)', chu vawiin khan Assembly Annex Conference Hall-ah an buatsaih a, Chief Minister Lalduhoma, Finance Minister ni bawk chuan a hmanpui. 

Chief Minister hian Mizoram sawrkar hnuaia document dik lo hmanga Family Pension la mek zawng zawngte chu ngaihhnathiamna hun hawn chhunga anmahni duh thu ngeia bansan (surrender) turin a ngen.

Chief Minister chuan pensioner-te chu an duhsak a, an pension benefit te, family pension te hi tha tak leh tluang takin la se an duh thu a sawi. Pension first formulation pawh chingfel hnem tawh a ni a. Pension tihfel mai thei loh tam takte hi an thawhna office lama an pension file khawihtuten training an neih that tawk loh vang a ni fo tih an hriat avangin chung mite zirtirtu tur Training Wing siam tumin hma an la mek a, an vanglai hun zawng zawng sawrkar tana hmang raltute an zah tih a sawi.

Lalduhoma chuan, "Hetianga kan pensioner-te kan duhsak em em lai hian Family Pension hi mi eng emaw zatin dik lo takin an la nia hriat a ni a. A then hi chuan tum reng vangin document lem hmangin an la nia an lan laiin mi tam tak hi chuan an hriat loh vangin an lo la an ni thei bawk a. Hetianga dik lo taka sawrkar sum luan raltirna hi tihtawp kan tum a ni," a ti.

Chief Minister chuan, "A bultan nan mahni duhthu ngeia PPO pekkirna hun, thla thum chhung kan hawng mek a, document dik lo, dawt behchhana family pension la ten anmahni duh thu ngeiin bansan (surrender) se kan duh a. He hun hawn chhunga pe kirte chu an sum lo lak tawhte kan chhuh dawn lo va, kan ngaidam dawn a ni," a ti.

Ngaihhnathiamna hun a ral hunah Task Force ten pension latute zawng zawng hi kal chilhin, a hmuna endikna an nei leh dawn a. Dik lo taka pension la an hmuhchhuahte chu tihtawpsak bakah hremna pek an tum thu a sawi bawk.

Chief Minister chuan miin dik lo taka Family Pension a lak theihna bul hi document lem a ni thin a. Document issue tute hi an pawimawh hle. Birth Certificate /Marriage/ Divorce/ Non-Marriage/Life Certificate/Income Certificate/Ration Card leh Pension lakna atana document-te chu an rinhlelhawm nia an hriat chuan an chhui zui zel tawh dawn a. Document issue tute hi lo fimkhur se an duh a. A tul a nih chuan document issue tute pawh an umzui zel dawn a ti.

Family Pension la tura mi an duhsakna lamah dan ang takin a qualify em tih an chhut thleng lo palh ang tih a hlauhawm a. Chuvangin, tunhma lama la tih ngai reng reng loh, Family Pension la thei tura tling leh tling lo te mipui vantlang hnena ram pum huapa inhrilhfiahna, Sensitisation Programme an duang chhuak a, vawiinah a bul an tanna a ni, a ti.

Khualzahawm TBC Lalvenchhunga, Adviser to CM (Finance & Planning) pawhin thusawiin, pension payment chu Revenue Expenditure lian ber a ni tawh a. Dan ang taka miin a lak chuan an lawmpui a, an duhsak a, dawt leh document dik lo behchhana sawrkar sum dik lo taka latute erawh chu en liam mai chi a ni lo a ni, a ti.

Tunah hian Mizoram saw rkar hnuaiah pension benefit dawngtu hi mi 39,954 an awm mek a, heng zingah hian superannuation pension la mek 22,139 leh Family pension la mek mi 11,194 an awm a. Pension chi dang latu Centralised Pension Processing Centre (CPPC) kal tlanga la 5629, Voluntary 594, VRS 289, Invalid 69 leh Compulsory mi 40 te an awm a ni.

Sawrkar chuan dik lo taka Family Pension latute tan mahni duhthu ngeia sawrkara pekkir (surrender) na hun July ni 1 atanga September ni 30 chhung a hawng mek a, mi thenkhat chuan an PPO te an pe kir tawh nia sawi a ni. He mi hun chhunga pe kir lo te dapchhuah hna hi thawh chhunzawm a ni ang a, document lem hmanga hetiang thil tih tumna hi a awm zui zel loh nan zau taka awareness kalpui a ni bawk ang.