ZALEN, May 01, 2025: Ni ruk chhunga vawi hnih chak tumin Laldinsanga a inhnek dawn a, bantamweight huangah round riat innuai turin Nilainiah an inbuk fel a, Ningani zan dar 9 velah Chinese boxer QuiMing Li nen an inhmachhawn ang.

WBC Youth champion Dinsanga hian Mizo mipui thlawpna a ngen a, world title chuh a tumna kawngah rahbi tuk sang zel turin QuiMing-a lakah chak a mamawh a; chutih laiin ni ruk chhungin inhnek hautak vawi hnih a hmachhawn dawn a, a awlsam lo ang. 

April 25 khan a vawi khat nan a awmna khua, Lungleiah professional boxing a khel zo chiah a, Leitlangpui mipui thlawpna tha tak hnuaiah Filipino fighter Bryan James Wild a hneh a, round riat inhnek tura tih an nih lain round rukna minute 1:30-ah technical knockout-in a chak a ni.

A promoter-ten a hmain Cripto Fight Night-a inlan turin ruahmanna an lo siam lawk tawh a, Ramee Dream Hotel, Dubai-ah QuiMing a hneh a nih chuan pro boxing a luh chilh atangin tlawm nei lova vawi 12 a chak zawnna a ni dawn a ni.

An sulhnu enin Dinsanga a rinawm zawk viau na a, kar khat pawh tling lo chunga tum hnih inhnek tur a nih avangin inbuatsaihna leh ruahmanna siam fuh a mamawh a; Lungleia a inhnek hnu lawkah trainer Sete Lalchhuanawma nen Dubai panin an zin chhuak leh nghal a, intuai thar turin hahdamna hun thawl a nei hman lo.

March 25 khan GuiMing-a inhnek hnuhnun ber a ni ve thung a, Cheng Zeng nen inhnek tawkin thla khat leh kar khat hnuah a inlan leh dawn. Pro boxing vawi 15 khel tawhin Dinsanga aiin inhnek hnem mah se tum ruk chakin vawi sarih a tlawm a, mi pahnih nen an inhnehtawk a ni.

Ningani zan dar 8-ah Cripto Fight Night tan a ni dawn a, inhnek vawi thumnaah Dinsanga leh QuiMing an innuai dawn a, a hun tur tak a hriat theih loh a ni.