ZALEN June 4, 2026: Election Commission of India (ECI)-a Deputy Director (Media) Apurva Kumar Singh, IIS chuan vawiin chawhnu khan Aizawl Press Club-ah thuthar thehdarhtute a kawm a. Special Intensive Revision (SIR) 2026 chungchang leh a kalphung te a sawi fiah a. Enumeration Form fill up tur leh thehlut ngei turin a ngen.

Mizoram-a SIR 2026 kalpui mek a nih dan a taka a rawn hmuh thu leh Reiek an tlawh thu sawiin, Chief Electoral Officer leh a thawhpuite, District Election Officer te, Electoral Registration Officer te, BLO te, media mi te leh thawktu dang zawng zawngte thawhrimna avangin lawmthu a sawi a. Mipuite chu Enumeration Form an thehlut hun chhunga thehlut ngei tur leh Enumeration Form te uluk taka fill up tur hian a ngen a ni.

Apurva Kumar Singh chuan SIR 2026 chu India ram pum huap electoral roll ennawnna leh siamthatna hna pawimawh tak a nih thu sawiin, electoral roll dik, felfai leh rintlak siam tumna beihpui a ni, a ti a. He hna hi ram pum huapin phase hrang hrangin kalpui a ni a. Mizoram chu Phase III-na ah telin, State dangte rualin hmalakna hi kalpui mek a ni, a ti.

Mizoram-ah Enumeration Phase chu May 30, 2026 atang khan tan a ni a, Booth Level Officer (BLO) te chuan In tinah kalin Enumeration Form sem, khawn khawm leh enfiahna hna an thawk mek a. India khua leh tui, vote nei thei zawng zawng te electoral roll-ah an tel vek theih nan leh tumah hmaih palh an awm lohna tura tan lak mek a ni, tih a sawi.

Apurva Kumar Singh chuan Election Commission chuan SIR 2026 kalpui turin ram pum huapin field-level election official tam tak ruat an ni tih a sawi bawk a. Mizoram-ah pawh BLO te, political party tin atanga ruat Booth Level Agent (BLA) te leh election official dangte chuan in tinah campaign leh mipuite tanpui hna an thawk mek a. Hei hi India Constitution leh electoral roll siam dan tur Danpui zawm chungin kalpui a ni, a ti bawk.

Media aiawhte zawhna hrang hrang chhangin, vote neih theih dan te, enrolment leh siamthat hna kalpui dan te, kumtling thar te E-Roll-a an inthun thar dan te leh SIR 2026-a political party te pawimawhzia chungchangte a sawi a. SIR 2026 felfai taka kalpui turin mipui mimirah puanzar tam a pawimawh thu sawiin, media ten theihtawp chhuaha election official te thawhpui turin a sawm a ni.