ZALEN May 26, 2026: Vawiin khan DC Pisa Pui Hall-ah Election Commission of India (ECI) Secretary. Binod Kumar hovin Aizawl District DEO, EROs, AEROs, Supervisers leh BLO ten meeting an nei a, ECI Secretary hian SIR 2026 kalpui tura inpuahchahnate leh hma lo lak a nih tawh chin bakah, hriatchian loh awmte, harsatna an neihte an ngaih pawimawh thu leh thurawn pe tura rawn kal a nih thu a sawi.

ECI Secretary chuan heng te avang hian meeting hi koh a ni tiin, thurawn pawimawh SIR official kalkhawm te a hrilh a ni. Binod Kumar chuan Electoral Roll felfai leh thianghlim neih nana SIR (Special Intensive Revision) 2026 hi kalpui a ni a. Rampum nghawng pha thil a nih avangin a buaipuitu ten taima tak leh felfai taka an buaipui hi ECI chuan a beisei a.

ERO leh BLO te chu SIR kalpui tura dan leh dun awmte hre bel hle tur leh theitawp chhuaha an duty hlen turin a chah a, enumeration form chu ni 5 chhunga semfel hman tum turin a chah a, duhsakna a hlan a ni.

Meeting-ah hian Aizawl District Election Officer Er. Lalhriatpuia’n SIR (Special Intensive Revision) kalpui tura Aizawl District inpuahchahna leh hma lo lak tawh chin PPT hmangin a entir a.

Aizawl District hnuaiah hian Assembly Constituency 12 awmin, Polling Station 324 a awm mek a. Rationalization hnuah chuan 359 awm tura beisei a ni. Voters 2,92,635 awmin, Mipa voters-1,36,654 leh hmeichhe voters-1,55,981 an awm mek a, Kum 2005 a voters awm zat chu 1,33,658 a ni thung. Electors mapped tawh hi 2,18,623 niin; chu chu 74.71% a ni. Enumeration form hi 5,85,270 print tawh a ni bawk.

Binod Kumar hian DC Pisa Pui Hall-a meeting a neih zawh hnu hian Gov’t. Middle School, Zemabawk west a Polling station a tlawh nghal a ni. ECI Secretary hi Vijay Gupta, Section Officer, ECI in a tawiawm a ni.