Mizoramah ruihhlo a hluar hle mai a, Excise & Narcotics department chhinchhiah danin May ni 22,2025 thleng khan Mizoramah ruihhlo hman sual vanga thi hi mi 1908 lai an awm tawh a. Hei hi department chhinchhiah chin a ni a, chhinchhiah lova thi hi engemaw zat an awm a rinawm. Hei mai bakah hian tun hnaiah Mizo ten zu kan thihpui nasa hle mai bawk a. Zu vanga mu hlum, thaw hah, pum tha lo leh zu hnathawh dang vanga thi engemaw zat an awm bawk a ni.

Tun hma deuh chuan ruihhlo do hna hi dan leh thupek kengkawhtu Police leh Excise bakah tlawmngai pawlte thawh turah kan ngai deuh niin a lang a. Tun hnaiah erawh kohhran hrang hrangte pawhin tih tak zetin an vei chho ta niin a lang a. Tun hma lama kohhran bil te te in anmahni puala camping leh hmalakna an kalpui thin kha tunah chuan min chenchilh nasat tak em vang hian tih tak zetin an vei ta a. Mizorama kohhran lian ber Presbyterian kohhran pawhin tun hnai khan gospel camping lian tham tak a buatsaih ta hial a, a lawmawm hle.

Mi tlawmngai hrang hrang ten ruihhlo ngaite enkawlna turin home an siam a, heng home hrang hrangte hi a khat em em reng mai a. Mihring heti zat lek awm chunga home heti zata tam kan nei leh home-a dah sen loh (?) an awm reng mai te hi a zahthlak hle. Tun hnai maiah ruihhlo ngaite enkawlna hmun pakhat atangin an enkawl mi thahnem tak an chhuah tir a, hei hian sawi zui a hlawhin inhnialna pawh a chawkchhuak tam hle.

Mizoram sawrkar chuan hetia ruihhlo ngai an vei suau suau mai hi tha lova a hriat avangin anmahni buaipuitu tur Core Committee on Hulhliap short stay centre a din ta hial a. He committee hian ruihhlo ngaiten anmahni enkawl nana an mamawh hmasa detoxification (ruihhlo atanga thuah faina) leh basic health care (hriselna atana mamawh hmasa) a ngaihtuahpui dâwn a, chumi atan chuan sawrkar department leh tlawmngai pawlte chu he committee ah hian an tel a ni.

He committee hian ruahmanna an neih dan chuan ruihhlo ngaite chu ni 15 atanga ni 20 chhung enkawl a, hemi hnu hian a tul anga home-ah dah leh an tum a ni. Committee hmalakna hi a hlawhtling thei anih chuan a lawmawm hle dawn a, chutih rual erawh chuan fimkhur erawh a pawimawh hle. Camping hi han buatsaih ta se ruihhlo ngai zingah lut duh thahnem tak an awm ngeiin a rinawm a, an luh duh chhan erawh a inang lo viau thei bawk. Ruihhlo ngai tam tak hi chuan sim duh tak tak vang pawh ni lovin enkawl an nih chhunga an ruihhlo ngaih chhawkna tur (detox damdawi) duh vang mai maia lut te pawh an lo awm tawh thin a, chutiang zelin campers zingah pawh a ruka ruihhlo lo keng lut leh zuar pawh an awm nawk zel. Chuvangin camping neih turah hian a tam lam en lova enkawl zawh theih tawk luh tir a, sim tum ngeite chauh luh tir thiam a pawimawh hle.