Tun hnai khan Hindi tihlarna ni Hindi diwas hman a niin Mizorama kan lalber pahnih Governor leh Chief Minister te chuan an hmanpui a. Chief Minister chuan thu a sawi naah Hindi thiam hi a tha satliah lo a, a tulin a tul tawh zawk tih a sawi a. Hindi thiam vang emaw thiam kan duh vang emawa an hnamzia entawn kher erawh a tul lem lo tih a sawi bawk a. Hemi awmzia chu Mizo takin Hindi hi a thiam theih tihna a ni.

Khawvelah hian tawng chi hrang hrang a tam hle a, mithiamte chuan tawng thenkhat hi chu la ral tur niin an ngai a. Khawvela tawng hmang tam zualte chu dingchang turin an ngai a, a chhan chu a hmangtu mipui an tam vang a ni ber. Tun dinhmunah chuan English hi khawvel mihring zingah hmang tu emaw hrethiam/tawng thiam an tam berna anih a rinawm a. Hindi pawh hi a hmangtu an tam avangin tawng ral lo tur zinga ngaih a ni a, India ram tawng anih bawk avangin kan hman uar chhoh deuh deuh a pawimawh hle.

India tawng lar a ni chung leh India rama awm kan ni chunga engvanga Hindi hi Mizo ten thiam lo bik riau nge kan nih tih hi zawhna pawimawh tak a ni awm e. Kan thenawm Myanmar-ah chuan Kawl tawng an hmang a, tlangrama chengte pawhin an thiam vek a. Bangladesh lah nise mipuiin an tawng hman Bengali an thiam vek bawk a, chutiang zelin ram hrang hrangah pawh a ni awm e. Mizo ten Hindi kan thiam loh bik chhan hi rambuai vang te kha anih a rinawm a, hei mai bakah zirlaibu-ah pawh a tirte atangin Hindi zirtir a ni lo a. Chumai bakah Hindi thiam tul tihlohna kha mi rilru-ah a awm len vang a ni thei bawk ang. Hei mai bakah Mizo kan hlang lutuk leh kan tawng hman ber Lusei tawng kan uar lutuk pawh hi tawng dang min thiam tir thei lotu niin a lang bawk.

Mizote hi kan makna em em chu hnamdang chuan an tawng thiam leh an tawnga thu sawi theite hi an kawmngeih a, keini Mizote erawh kan tawng thiam deuh hnamdang chu kan ngei/haw tlat zel a, kan inenfiah a pawimawh hle. Engpawhnise India ramah kan awm a, kan la awm zel dawn ni pawhin a lang. Chuvang chuan kan ram tawng Hindi thiam hi kan tan a pawimawh a, school lamah pawh ni khat Hindi tawng hman ni atan ruahman a ni te hi a lawmawm hle. Tawng kan thiam hian kan tlangnel a, khawi hmunah pawh kal dawn ila kan zuam thin. India ram chhungah hi chuan English aiin Hindi hi a lar zawk daih a, phai zin nikhuaah pawh hmanna a tam zawk. Tawng thiam loh chuan mahni inkiltawih a na duh thin. India ram kan awm chhung hi chuan Hindi hi a pawimawh chho deuh deuh dawn a, chuvangin kan uar deuh deuh a pawimawh hle.