Mizo ten Hnam dang laka kan inhumhimna pawimawh tak chu Inner Line Permit (ILP) hi a ni awm e. Hnamdang Mizoram lut turte chuan ILP hi an neih a ngai a, ILP hi nei lo ila chuan kan chhehvela hnam lian leh tam zawk te hian min chimral hial tawh mai thei. Chuvangin venhim leh dik taka hman kawngah mipui ten mawhphurhna sang tak kan nei tih kan hriat thar fo a pawimawh hle.

ILP hi Mizote tan chuan thil tha tawp a ni a, chutih rual erawh chuan hnam dang tan chuan a hnawk hle in a rinawm. A chhan chu India khua leh tui theuh theuh, khawi hmun emaw tlawh dawna phalna lak kher a ngai hi a ni. Hnawk ti an tam vang hian tihtawp duh engemaw zat an awm mek zel a, a chang hi chuan ILP hi nghing dawt dawt a tih theih awm e. Eng chen nge hman zui zel anih ang tih erawh zawhna chhan har tak a ni. Mizoram sawrkar chuan tha zawka ILP kenkawh anih theih nan ruahmanna a siam mek a. ILP chungchang sawi thar a awm leh chhan hi Sairang thleng rel a lo luh tak vang leh nitin khualzin za tel an lo luh tak vang niin a ngaih theih.

Pawimawh ta ber chu eng angin ILP dan hi siam thain khauh taka kenkawh pawh tum ila a hmangtu ten kan hman that loh chuan awmzia a nei dawn chuang lo a ni. ILP hi keimahni Mizote ngei hian kan hmang dik lo tlat mai zel a, ILP lak dawna kan intiamna leh tih tur hrang hrang awmte kan tih thin loh vangin hnamdang thahnem takin min chamchilh reng a ni. ILP kan sponsor dawnin an hnathawh tur te, an cham rei hun chhung turte ziah lan thin a ni a, mahse a chhawrtu leh sponsor tute hian hna an thawh zawh hunah pawh ngaihsak zui lovin an duh duh an ti zui zel a. Police leh tlawmngai pawl ten ILP an check a mi thahnem tak mai man tur an awm ziah mai te hi a fuh lo hle.

Tun dinhmunah chuan ILP nei lo kan hremna awmchhun chu man khawm hnua pawisa chawi tir leh ramria dah hi a ni mai awm e. Mahse heng ILP nei lote hian Mizoram luh an thulh chuang si lo a, dan ang takin ILP hi nei se harsatna an tawk lo tur a ni chungin zawm tha duh miah lo an awm tlat te hi a thinrim thlak hle. A tul anih chuan ILP nei lo leh dan bawhchhiate chu jail tan tir leh Mizoram an awm/luh theih tawh lohna atan an hming chhinchhiah (black list) hial pawh a sual lo ang. ILP pe chhuaktute pawhin dilna a dik ngei em tih leh an tih tur (purpose) anga hman a ni ngei em tih pawh uluk zawka enzui a pawimawh. A sponsor tute pawhin an ngaihsak zui zel nan engemaw tal chu dan siamthat turah hian bilh telh a pawimawh bawk. Chuvangin ILP ennawn turah hian tun aia dan bawhchhiate hremna na leh khauh zawk dah tel a pawimawh hle.