Mizoramin state dang leh ram pawn atanga nitin mamawh leh bungrua kan lakluhna ber chu motor a ni a. Rel chuan tun dinhmunah Bairabi thleng buhfai a rawn phur thin a, nitin mamawh dang erawh motor a phurh thin a ni. Thlawhna service chu awm maahse bungraw phurhna atan ni lovin khualzin tan a ni a. Chuvangin motor kawng tha hi kan nitin mamawh chawkluhna atan chuan hun engemaw chen kan la mamawh reng dawn niin a lang.

Tun dinhmunah chuan kan nitin mamawh kan lakluhna ber chu Silchar kawng kan tih mai national highway no.306 leh no.6 hi a ni a. Mahse kan mamawh lakna ber kawng erawh kum tin mai lirthei kal hleih theih loha a awm reng mai hian ngaihtuah a ti thui hle. State danga kawngpuite hi kumtin siam an ngai ve ang em aw tih mai a awl rum rum mai.

Helai kawng hi Congress an ni emaw MNF an ni emaw tuna sawrkar mek ZPM pawh hian an siamtha thei lo em ni aw tih mai turin kan buai reng mai a. Congress hunlai pawhin a chhia a, MNF sawrkar hunah pawh tuna rorel mek ZPM te hian kawng chhe laiah banner te tarin sawrkar an dem thu an sawi a. ZPM sawrkar hnu nikum lamah pawh kawng hi a chhe tho a, khar hial ngaia a awm avangin Mizorama tlawmngai pawl lian ber YMA hruaitute pawhin an tlawh hial anih kha. Kum danga kan harsatna atanga inzir chhuah awm chuang lovin kuminah pawh kawng hi lirthei tan tlan hleih theih loha a awm avangin tun hnai maiah pawh mi tlawmngai ten an siam hial a ni.

Kawng chhia chungchangah hian sawrkar kal tawh leh tuna kan hrawn mek pawh hian chhuanlam an nei thei zel a, an chhuanlam chu engpawh nise an thlirna atang chuan a dik ang a. Mahse kum tin deuh thaw a chhia a, mipui ten harsatna kan tawk thin erawh sutkian dan awm thei se a duhawm hle. Khawi hmun leh ram pawh nise inkalpawhna kawng a that miau chuan a chhawrtu chu mipui an ni a, chutiang bawkin a tangkaipuitu chu mipui bawk an ni. Tun hnai maia kaan nitin mamawh lakna pui ber kawng kal theih loha a awm chhung ringawt pawh khan oil lamah harsatna kan tawk nghal a, nitin mamawh lei tur a vang tanin a man pawh a to phah hman a ni.

Helai kawng chungchangah hian sawrkar lam chuan an kut anih tawh loh thu leh NHIDCL kut anih thu an sawi nasa hle a, NHIDCL lam erawh chuan PWD kut atang an la la chiah lo niin an sawi ve thung. Engpawh nise kan ram kawngpui a ni a, a chhiat chuan a tuartu chu state dang ni lovin Mizoram mipui kan nih tlat avangin sawrkar hian a kut a sil thei lo ang. Kan chak lakna ber kawngpui kum tin maia chhe thin hi tlo zawka siam anih theihnan tih tak zeta sawrkar hian hma a lak a ngai e.