Mizoram hi kan hriat angin thawh chhuah nei tlem state kan ni a, kan mamawh zawng zawng deuh thaw hi sawrkar laipui atanga kan dawn leh hmuh a ni. Hei vang hian politics thilah pawh central lama zawmpui neih a that thu hi party thenkhat chuan an tlangau pui a, a dikna chen pawh thui tak a awm thei awm e. Thawh chhuah nei tlem kan nih miau avangin sum puk a ngai thin a, hman ata tawh vawiin ni thlengin kan politician te au hla ber pakhat chu leiba politics hi a ni.

Chief Minister Lalduhoma chuan March ni 30,2026 a ZPM office-a a thu a sawi naah 'Tuna kan leibat zat hi SASCI avang tein a lang tam lo thei lova, a lan tam hi kan duh zawk,' tiin a sawi a. Hetih lai hian Hachhek bialtu MLA Robert Romawia Royte chuan March ni 23,2026-a Hnam Run-a thu a sawi naah 'ZPM hian opposition an nih laiin sum puk chungchangah 'mipui min dahkham', 'kan puk ve dawn lo' ti tein an sawi thin a. An han sawrkar a, a puk theih zawng zawng an puk a, a tam thei ang ber puk hi an policy a ni. Kan budget aiin kan leiba a tam zawk a ni,' tiin a sawi ve thung a. Hei hian chiang taka a lantir chu sawrkar lai ten sum puk leh leibat an sawimawi a, eptu apiang ten sawrkar beihna atan an hmang hi a ni.

Tuna sawrkarna chelh mekte hian eptu lama an thut lai chuan sum puk hi nasa takin an sawisel a, tunah erawh an sawi mawi thung a. Chutiang bawkin tuna eptu MNF te pawh hian an sawrkar lai chuan an sawimawi a, tunah erawh sawrkar beihna atan an hmang thung. Hun kal tawh lamah pawh chief minister pakhat chuan 'Bat tam hi changkanna' ti hialin a lo sawi tawh anih kha. Engpawh nise sum puk chungchangah hi chuan kan awmna a zirin kan thlir dan hi a dang zel tih a chiang hle.

Engpawh nise Mizoram hi state intodelh lo kan ni a, hmasawnna hna kan thawh dawn chuan sum puk hi a ngai ngei ngei a, kan puk loh chuan hmasawnna hna kan thawk thei dawn lo tihna a ni. Sumdawng leh hmathar la tur chuan sum an puk a ngai thin a, chumi hmang chuan inpei pungin tam zawk an thawk chhuak thin a ni. Chuvangin sum puk ringawt hi inbeihna atan hmang lo ila, kan hmanna lam a dik em? Hmasawnna hnathawh nan nge kan hman party mi leh sa induhsakna atan tih hi kan thlir dan nise a duhawm hle.

Mizo mipuite hian hmasawnna tur anih chuan chhiah pek hi kan hreh lo a, tun sawrkarin eng chhit man tihsan loh tur a ti ringawt te pawh hi state intodelh lo tan chuan a fuh lem lo hle. Sawrkar hian sum thawh chhuahna tur a ngaihtuah hi a ngai a, tu te emaw hmaizah vanga chhiah lak loh ringawt te hi a fuh lo. Chhiah hi pe tam ila, mipuite hi a hmanna lamah thikthu chhe ve thung ila leiba politics hi chu a ziaawm maiin a rinawm e.