Tun hnai maiah exam zawhna putru vangin buaina nasa tak a chhuak a, zirlaite leh Police te inepin nunphung nasa takin a buai phah a. Union Education Minister Dharmendra Pradhan pawh a ban phah hial anih kha. Kan hriat angin Jharkhand state lamah pawh an state public service commission chairman pawh engemaw thil avanga bangin a hnuah police ten an man a. Mizoramah pawh hna sang latu Mizoram Public Service Commission thiltih danah dik lo leh engemaw felhlel a awm nia hriain zirlai pawl te chuan an pisa kai tur an dang hial a, mahse sawrkar lamin a chhuichiangtu tur din a tum vangin pisa kai an dan chu an titawp ta hrih a ni.

MPSC hnalak leh thiltih danah hian thil fel tawk lo a awm niin Mizorama zirlai pawl pahnih Mizo Zirlai Pawl (MZP) leh Mizo Students Union (MSU) chuan an sawi a, heta an sawi tlanglawn ber chu exam turte inziah luhna One Time Registration (OTR) chungchang hi a ni. Zirlai pawlte hian OTR vang hian exam tum zirlai ten harsatna nasa tak an tawk tih sawiin tihtawp emaw siamthat an duh a. Hetih lai hian Mizoram Public Service Commission chuan hna diltute tum khat in register-a hna an dil apianga an rin zui theih tur One Time Registration (OTR) tihtawp chu hna diltute hmakhaw ngaih avangin tih tawp chi a ni lo an ti a. MPSC tarlan danin OTR tihtawp a nih a, hnaruak a awm apianga a hrana document pawimawh thehluh thar zel ngai chu hna diltute hmakhua thlirin pumpelh tir hram zawk chu an duhdan a ni tih sawiin OTR chu tul loa hun khawhral ti tlemtu, candidate te tihsual palh vengtu, document pawimawh humhimna a ni an ti thung.

OTR hi state dang Public Service Commission-ah chuan hman vek tawh niin a lang a, zirlai pawl te phut anga tihtawp anih chuan kan state tan a tha lo zawk mai thei bawk. Engpawhnise kawng lehlama ngaihtuah chuan exam tur zirlaite pawhin an inziahluh dan a felfai em tih te, document thehluh loh a awm em tih leh an form fill up ah te fel lo a awm em tih uluk taka an enfiah (check) hi an mawhphurhna a ni a. Tuna OTR vanga harsatna tawk zirlaite hian an form thehluh a famkim leh famkim loh emaw, a dik leh dik loh emaw an finfiah lo tihna a ni a. Chuvangin kawng lehlama ngaihtuah chuan hetianga fel lo nuaia thil ti hi chu sawrkar hnathawk tlak pawh an ni dawn em ni pawh a tih theih hial awm e.

Tunhnaia zirlai pawl pakhatin chief minister an hmuhnaah MPSC-in tun hnai kum khat leh a chanve chhung hian tihsual siamthatna (corrigendum) vawi-16 chuang zet an chhuah niin an sawi a, hei hi a dik anih chuan thil fel lo tak a ni a. Duhsak bik nei lova dik leh felfai taka hna thawk tura din hian an hna an tlin lo hle tihna a ni. Engpawhnise MPSC chungchang enfiahtu tur committee din a ni ta hi a lawmawm a, he committee hian siamthat ngai a awm chuan huaisen takin an siamtha turah ngai ila, huaisen leh dik takin thil a tih ngei beisei phawt ang.