Mizoram sawrkar chuan kumin April thla atangin health care scheme thar Mizoram Universal Health Care Scheme chu a hmang tan ta a, he scheme hi a that viau rualin sawrkar damdawi in ni lo, private damdawi in thenkhat ten an pawm/ hman duh loh avangin harsatna a awm a. Hei vang hian a tangkai tur angin a la tangkai tawk lo a, chuvangin tuna harsatna awm mek hi chinfel ran ni thei se a duhawm hle.

Mizoram chhunga sawrkar damdawi in ni lo ten MUHCS an pawm loh chhan hi a rate hniam emaw pawisa lam harsatna lam vang ni lovin sawrkar enkawl ni lo damdawi in te inkhairual an duh vang niin a lang a. MUHCS ah hian damlo phai lama inenkawlte chu bill let leh theih 'reimburse' phal an ni a, hei hi Mizoram chhunga damdawi inah chuan phal a ni lo lai bik hi a ni. Helai thu inchuh lai hi a tak anih chuan sawrkar hian Mizoram chhung damdawi in te aiin phai lam damdawi in a duhsak zawk tihna a ni dawn a, private damdawi in ten an pawm lo hi an thlirna zawn atang chuan a awm hle a ni. Helai tak hi a mu tan lai anih chuan sawrkar leh mimal/pawl enkawl damdawi inte hian inbiakna neiin a chinfel dan zawng thei se a duhawm hle.

Mizoram Universal Health Care Scheme hi a nihna takah chuan damlo harsa tan hian thil tha tak a ni a, mahse damdawi in tam takah hman theih a la ni lo lai tak hi a buaithlakna lai chu a ni a. Damlo rethei tan chuan engmah senso ngai lova inenkawl theihna tluka hlu leh tha a awm awm lo e. Chutih rual chuan damlo tam tak hian private damdawi in hi kan pan lo thei lo a. Private hi kan duh ngawr ngawr vanga pan ni lovin loh theih loha pan a ngaih chang a awm thin a ni. Sawrkar damdawi in hian min zo lo nasa em em a, Aizawl khawpui bik phei chu Doctor thiam awm khawmna a nih mai bakah khawl pawh a awm thatna hmun a ni a. Sawrkar damdawi ina khum chang lo tan chuan private hi pan loh theih a ni thin lo a ni.

Health care chungchangah hian engemaw harsatna neuh neuh a awm avangin kum dang zawng aiin inziaklut pawh an tlem niin an sawi a, hei hi a tak anih chuan a pawi hle. Mi tam tak hi eng vanga inziaklut lo nge an nih tih ngaihtuah theih deuh a ni a, chutih rual chuan a chhanna awlsam ber chu mipuiin an ring tawk lo tih hi a ni awm e. Tun anga inziaklut an tlem chuan sawrkarah bill lut a tlem dawn tihna a ni a, sawrkar hnathawk ten hman hrih loh nise an tih bawk avangin tun dinhmunah chuan sawrkar chuan sum sen a nei tam dawn lo niin a lang. Mizoram Universal Health Care Scheme chungchanga harsatna awm hi chinfel theih niin a lang a, sawrkar leh mimal damdawi in te hian dawhkan khat kilin an harsatna hi chinfel dan dap thei se a duhawm hle.