Zoram Peoples Movement kaihhruai sawrkar chuan Mizoram khua leh tui ten a thlawna damdawi inenkawlna an dawn theihna atan Mizoram Universal HealthCare Scheme chu April ni 1,2025 atanga hman tan turin a ruahman a. May ni 25,2025 atangin inziahluh hun hawng tanin June ni 30,2025 thleng inziahluh theih a ni a. Ruahman dan chuan he policy hi March ni 31,2026 thleng tura duan chhin phawt a ni.

MUHCS hi Mizoram mipui zawng zawng huapzo ni tura duan niin, Universal Health Coverage tih hlawhtlinna atana kailawn pawimawh tak a ni a. Damloh nikhuaa inenkawlna senso phurrit ni thin chhawk zangkhaina tur leh mahni sum insengso lova damdawi ina a thlawna enkawlna (cashless) dawn theihna tur atan he scheme hi duan a ni. He scheme hi a hmang tangkaitute tan chuan a tha hle a, mahse hman tangkaina tur damdawi in thenkhatah harsatna a awm vangin duh angin a la tangkai tawk lo a, a pawi hle.

Mizoram Universal Health Care Scheme (MUHCS) hnuaiah hian June ni 3,2025 thleng khan damlo mi 8251 inenkawlna senso Rs. 9,24,66,141 pek sak an ni tawh a. MUHCS ah hian golden card nei kan tih mai AB PMJAY ah chhungkua 216,584 inziaklut sa an ni a. Hei bakah hian pensioners 80082, sawrkar hnathawk nghet leh provisional employee te zawng zawng, CSS/GIA te bakah inziak lut thar (contributory) chhungkua 5082 an awm tawh a. June 2025 thleng inziah luh theih a ni a, mi eng­zat chiah nge inziaklut dawn tih chu naktip mai hian a hriat tawh dawn a ni. 

MUHCS hi sawrkar damdawi inah chuan a hman theihin damlo pawh a thlawna enkawl zel an ni a, hei bakah hian private damdawi in engemaw zat chuan an pawm tawh bawk. Mahse private damdawi in thenkhat, mipui nawlpui ten kan pan nasat ni si ten an pawm ve lo tlat hi tuna harsatna ber chu a ni. Private damdawi inte hian sum lamah sawrkar hi an ring tawk lo niin a lang a, hei bakah hian a rate hi hniam an ti deuh niin a lang. 

Sum chungchangah hi chuan MUHCS tluang taka kalpui a nih theih nan MUHCS zawmtu hospital ten chatlak loa sum an hmuh theih nan Finance Dept. in advance in sum a sanction thin dawn niin sawrkar chuan thuchhuah a siam a, ruahman dan chuan quarter khat (thla tum) ral hma in MSHCS in anticipated claim amount a chhut zat ang a sanction dawn a ni.

Heti anih chuan sum pek chhuah kawngah chuan harsatna a awm dawn lo niin a lang a, tuna harsatna lai tak chu rate chungchang hi a ni ta a ni. Private damdawi inte hian MUHCS in rate a siam chu an tan chawibelhna nia hria in an pawm thei lo a, he harsatna chingfel tur hian tunhnaiah sawrkar lam leh private damdawi in neitu NGHAM te chu an inbia a. Inrem tur chuan mipui harsatna hre chunga tlawm ngam a ngai a, an inbiakna hian rah tha chhuah ngei se a duhawm hle.