Mizoram hi ruihhlo siamna hmunpui golden triangle hnaiha awm kan ni a, hei vang hian ruihhlo tawlhna kawng atan hman a ni thin. Kan thenawm Manipur state-ah hnam leh hnam inkara buaina a chhuah hnu atang phei chuan ruihhlo tawlhna kawng ber atan hman a ni ta a. Hei mai bakah thenawm ram Myanmar-ah sawrkar a mumal loh avangin ruihhlo tawlhtute hian remchang an la ve zel niin a lang.

Ruihhlo tawlhna atan Mizoram chu hman anih mai bakah Mizo thalai zingah damdawi hmangsual an tam hle a. Hei vang hian Mizoram sawrkar chuan tlawmngai pawlte nen tangkawpin ruihhlo laka kan ram a him theih nan September,2025 atanga December, 2025 chhung hian Mizoram-ah ruihhlo do beihpui (Operation Against Trafficking and Use of Drugs and Narcotics in Mizoram) kalpui ta hial a ni. August ni 7, 2025 khan Mizoram sawrkar a Home Department, Excise & Narcotics Department, Mizoram Police, SIB leh CYMA hruaituten awmze nei leh zuala ruihhlo do anih theihnan meeting neiin uluk taka sawihona leh inrawnna an nei a. Meeting-ah hian Mizorama ruihhlo lo lut te hi Burma lam atangin a hlawmin a rawn lut a, chung a rawn luhna hmun 22 te pawh tarlan a ni hial.

Sawrkar leh tlawmngai pawlte hian nasa takin hma la bawk mahse ruihhlo erawh a tlem phah lutuk lo niin a lang a, a chhan chu ruihhlo ti thin ten ruihna tur an la hmu reng a. A man erawh a to phah deuh thung. Ruihhlo hian kan hnam hi a ti buai tak zet a, a bikin thalaite zingah thuk takin bu a khuar tawh a ni. Khua/veng khatah pawh a ruk a ti leh rin loh deuh deuh, mahse ruihhlo a fihlim lo mi thahnem tak an awm tawh niin an sawi. Kan rama tlawmngai pawl lian ber YMA in ruihhlo do kum an puang hi a lawmawm tak zet.

Ruihhlo ti thinte hi an huangtau in khaw eng pawh an zah lo hle mai a. Kan khawpui ber Aizawl khawlaiah pawh ualau takin ruih­theih thil hi an inpe a, mihring pawh zah zo lovin an inchiu ngawng ngawng ngam bawk. Vanapa Hall leh a chhehvel te hi han en ila, ruihhlo ti thin te an fuankhawm tup tup mai a, hmeichhia chu sawi lo mipa tan pawh a him lo hial mai. Sawrkar leh kohhran tangkawp pawhin ruihhlo ngaite pual hian camping 'Hulhliap short stay centre' tum engemaw zat a buatsaih tawh chungin heti zat mai ruihhlo ngai an la awm hi a pawi tak zet. 

Hetiang zela kan kal chuan hnam boral kan la ni mai ang tih pawh a hlauhawm hle. Tuna ruihhlo kan do dan hi chuan awmzia a nei thui lo deuh niin a lang, kuminah ringawt pawh ruihhlo thihpui mi 73 an awm tawh hial. Chuvangin sawrkar, kohhran leh tlawmngai pawl te hian kan hnam a dam theihnan tun aia nasa zawk hian hma la thei se a duhawm hle.