Rel-in Sairang a rawn luh tak avangin Mizoram-a khualzin rawn lut pawh an tam chho mek zel a, Chief Minister Lalduhoma chuan Travel Fest 2025 a hmanpuinaah kum hmasa statistic aiin 139.50% in khualzin an pung nia chhut a nih thu a sawi a, rel a rawn luh takah phei chuan khualzin hi an pung zel dawn tih lang reng a, chuta pawimawh ber chu Mizoram luh phalna Inner Line Permit(ILP) pekchhuah a nih dan hi fimkhur a ngai dawn khawp mai.

ILP hi MZP leh MSU te hian tun hma atang tawhin an buaipui em em a, rel a rawn luh tak hnuah phei chuan theihtawpin hma an la nghal a, sawrkar an duhkhawp lohna te Sairang rel station a permit pekchhuah dan pawh an duhkhawp lo thu an lo sawi fo tawh a, a hmun te pawh an zuk tlawh tawh a, thawktu indaih lohna chu an vei hle. Sawrkar lam pawh hian theih tawp an chhuah chuan a lang a, a tira duty tur an dah pawh an indaih lo tih hria in an dah belh leh tawh a ni.

Home minister K. Sapdanga hovin rel station-a ILP pek chungchang hi official in sawiho a ni a, hemi tum hian Kolasib SP David H. Lalthangliana chuan Kolasib District chhunga ILP pek chhuah a nih dan report a pe a. Kolasib chhunga rel station-ah bik hian ILP 38 pek chhuah a nih tawh thu a sawi a. Sairang thlenga rel service a awm hnu atangin Vairengte a ILP pek chhuah leh Inter-state sumo service chu 30%-40% vel laiin a tlahniam niin an hriat thu a sawi bawk.

Aizawl Additional SP Lalringliana Pachuau chuan Sairang Rel Station a ILP pekchhuah dan a report a. Rel station hawn tirh atangin counter pali (4) siam a ni a. A tirah police pariat (8) duty dah niin tunah hian paruk (6) dah belh leh an ni tawh a. Ni 08.10.2025 thleng khan ILP 4,064 pek chhuah tawh an ni a. Hei bakah hian Sairang Zero-Point ah a khat tawkin ILP surprise checking neih thin a nih thu a sawi bawk.

MZP chuan Guwahati atanga Sairang thleng ticket a full reng laia ILP pekchhuah a la tlem lutuk chu an ngaihmawh thu an lo sawi ve thung, anni record-ah hian chuan Rel station atanga pekchhuah tawh hi 3,852 niin an chhinchiah thung a ni.

A enga pawh chu ni se, Chief Minister sawi ang deuhin kan mikhual tam ber tur kan Indian pui te hi kan lo hlauh ringawt a dik lo, a tih ang deuhin lo in pawng hlauh ringawt hi a fuh lo a, chutihrualin mipuite hi khualzin dawlzo turin kan inpuahchah a ngai a, chutihrual chuan sawrkar lam pawhin ILP pekchhuah dan kawngah tan lak a ngai a, awlsam zawka pekchhuah dan leh mumal leh awmze nei zawka endik hna an thawh theihna turin hma an lak a tul a, Tourism-a tan kan lak viau lai hian mi dang tana harsatna kan siam tam lutuk chuan khualzin hi kan tum angin kan hip tam tawk loh ang tih pawh a hlauhawm thei a ni.