School Education Minister Dr. Vanlalthlana chuan tun hnai khan chanchinbumite kawmin a department School Education hnuaia hmathar lakna tur chi hrang hrang a sawi a, chung zingah chuan class X leh XII result bu-ah zirlai titha zual (top ten), zirlai pass te division leh letter hmuh dan tih lan a nih tawh loh tur thu te, Mizorama academic calendar kan hman mek April atanga March chu kum 2027-28 session atangin tih danglama January atanga December an kal tawh tur thu te, English medium school-ah home language day hman a ni dawn tih te, School zawng zawngah Hindi speaking day hman a ni dawn tih bakah common uniform hman thin chu chhunzawm a ni dawn lo tih te a sawi a ni.

Congress hun laiin a tha zawka nia ngaiin school sawikhawm 'comprehensive' kalpui a ni a. Khatih laia sawrkarna fawng vuantute khan a that zawk zia leh zirtirtu thiam zawk ten thiam lo zawkte an hmui theihna anih bakah administration chungchangah pawh awlsamna a thlen niin an sawi a. Chumai bakah school tan hun pawh an ti hma anih kha. Heng thil pahnih Congress sawrkar laia kalpui te hi rei pawh hman anih hmain tih tawp leh a ni a, comprehensive chu thil tha lo zawk nia hria in tih tawp a ni a. School tan hma pawh naupang tan leh nu leh pa tan a tha lo zawk nia hria in tihtawp leh a ni.

MNF sawrkar khan school timing chu zing dar 9 ah an sawn a, hei bakah school hrang hrang ten uniform inang lo zung mai an ha chu a tha lo nia hria in inang tlang nei turin ruahmanna an siam bawk anih kha. Tunah sawrkar thar chuan Education bika a hmalakna langsar takah chuan academic session a ti danglam leh ta a. Sawrkar kal tawh leh tuna sawrkar mek thleng hian Education department kaldan hi kan thlak danglam ngun hle mai a, thil tha zawk zir chhuak thei tawh ila a tha hle.

Comprehensive te kha a thatna leh thatlohna kha kan zir chiang hman reng em? A tha emaw tha lo pawh lo nise khatiang hun reilote chhunga kaldan thlak danglam te kha a fuh viau lo niin a lang. Comprehensive pawh a tirah chuan kan hmang/awm thiam lo a, mahse kan in siamrem dawn chauh a, a hmaa kaldan pangngaihah min let pui leh a. School tan hun chungchangah pawh phai lamah pawh an ti thei a, naupang ten lehkha zir bakah thildang zirna hun an ngah phah dawn mai bakah kan tho hma zawk dawn tiin kan hmang a. Mahse a hnu lawkah ti danglam lehin kan sawn tlai leh a. School luh hun chungchangah pawh 'phai lama an tihdan anga kal a tha e' tiin a hmaa January atanga December kal thin kha April atanga March chhunga school kai turin ruahmanna siam a ni a, tunah a hma lama kan duh loh January atanga December ah school kai turin ruahmanna siam leh a ni.

School Education ah hian enchhinna hi kan hmang nasa hle a, thenkhat hi chu zirchianna awm lem loa kalpui mai te pawh an ni em ni aw tih mai awl tak a ni. Engpawhnise tunah sawrkar in ruahmanna thar an siam leh a, hei hi mithiamte nen zirchianna atanga ruahmanna siam niin an sawi a. Tuna ruahmanna thar kalpui leh tur hi chu a that zawkna emaw that loh zawkna emaw hre ngei turin hun rei zawk kalpui theih tawh nise a fuhin a rinawm e.