Zofa Welfare Organisation ten tun hnaia chanchinbumite an kawmnaah Mizoram chuan State Human Rights Commission a neih ve theihna turin hma nasa takin an la tih an sawi a. High Court-ah pawh PIL thehlutin hemi kal zelah hian Mizoram sawrkar pawh Commission din tur hian a in buatsaih mek nia an hriat thu leh lawmawm an tih thu an sawi a. Mizoram sawrkarin Commission hi a din lo anih erawh chuan din a nih ngei theihna turin hmalak chhunzawm zel an tum tih an sawi. Zofa Welfare Organisation te hmalakna hi a lawmawm a, an thlirna atang chuan mihring dikna leh chanvo palzutna awm thin hi a lo ziaawm nan leh mirethei ber pawhin an dikna an chan ve an duh vang anih ngei a rinawm. State tam takin State Human Rights Commission hi an din tawh a, India ram state la din ve lo tlemte zingah Mizoram hi a tel a ni. 

State Human Rights Commission hi mite dikna leh chanvo humhalhtu tura din a ni a, thuneih­na sang tak nei niin dan bawhchhiat, mihring dikna chanvo palzut leh thildangte ngaihtuah thintu a ni a. Dan tlangpuiin State Human Rights Commission ah hian member pathum, Chairman leh member dang pahnih an awm tlangpui thin. Chairman hi High Court Judge chawl an ni thin a, member tur pawh hi High Court Judge chawl emaw District Judge a kum sarih tal lo tang tawh hman an ni thin.   

State Human Rights Commission hi engvanga sawrkar hian din lo nge anih a, enge a din loh chhan leh a muan chhan hi hriatthiam a har a. Chutih rual chuan hetiang Commission din hi kan ram leh hnam tan hian thil pawimawh hmasa ber zingah a tel em tih pawh sawrkar ngaihtuahnaah chuan thil awm thei a ni. Mizote hi kan hriat angin kan pi pu atanga khawtlang a rorel thin, vantlang lalna leh tlawmngai pawlte thuneihna hmun a ni thin a. Hei hi vawiin thleng pawhin kan la chhawm zel a, kan rama tlawmngai pawl tam tak hian sawrkar dan leh thupek kengkawhtute hi tanpuiin hna ropui tak tak an lo thawk tawh thin a ni. A tul chuan YMA a ni emaw MHIP, VDP, JAC leh a dang ten thil tisuala puhte man in an thiam dan ang angin hma an la thin. Dan leh thupek kengkawhtu tura ruat ni lo ten hetia hma an la thin hi Commission thlirna hnuaiah chuan a rem tawh lo mai thei a ni. 

Engpawhnise SHRC hi din tumin sawrkarin hma a la chho mek niin a lang a, chutih rual chuan chairman leh member ruat kawngah erawh fimkhur a ngai dawn hle tih a lang. Chairman atan hian High Court Judge chawl tawh an nih a ngai a, hetiang hi Mizote-ah chuan kan la tlem hle a, chuvangin hnamdang ruat an ngai dawn niin a lang a. Kan hnam chindan leh inrelbawl dan min hre­chiangtu kan dah anih loh chuan harsatna hrang hrang kan tawh a hlauhawm hle. Engpawhnise State Human Rights Commission hi kan dikna chanvo humhimtu tur a ni a, Mizoramin kan neih loh avangin mi tam tak chuan zualkona tur nei lovin an tuar tawh a, sawrkar hian din thuai se a duhawm hle.