Chief Minister Lalduhoma chuan Thenzawl-ah khawpui dang din turin hma a la a. He a hmalakna tih hlawhtlin ngei tum hian nasa taka tan la in Prime Minister, Union Home Minister leh mi pawimawh dangte a hmuhnaah pawh he thil hi sawi chhuakin sum mamawh angte te pe turin a ngen a ni. Chief Minister hmalakna avang hian Ministry of Housing and Urban Affairs (MoHUA) chuan tun hnai khan Thenzawl Peace City project Detailed Project Report (DPR) siamna tur atana cheng vaibelchhe 10 a rawn pe ta a ni.

Ministry of Housing and Urban Affairs (MoHUA) atanga vaibelchhe 10 a lokal takah chuan titi leh inhnialna a siam tam ta hle mai a. A bikin eptu lam chuan sawrkar chu a ruka khawpui 'state capital' sawn tumah puhin na takin an sawisel a. Mahse sawrkar lam erawh chuan MoHUA atanga sum hmuh chu state capital sawnna atan ni lovin Thenzawl Peace City atan anih thu an sawi ve thung.

Hetia inhnialna karah hian Thenzawl Joint VC, All NGO leh All party chuan Thenzawl hmuna Peace City din tura hmalakna an thlawp tih an sawi a. Thuchhuah intawm an siamah Pathianin Mizo te chenna tur ram min pe a, zofate tana hmun him Aizawl atanga hla lo, Aizawl khawpui nena tangkawp thei tur khawpui neih belh hi kan State hian a mamawh hle tih an sawi a. Thenzawl chu Mizoram ramlai, chhim leh hmar chhak leh thlang mipuite tan pawh a panna awlsam tak leh hmun rem tha tak awmna a ni tiin Peace City chu Pathian remruat ngeiah an ngai tih sawiin he hmalakna kal chho turah hian Zoram mipui leh zofa zawng zawngte tawiawmna an ngen a ni.

Kan hriat angin kan khawpuite hi ruahmanna fel tak siama din an ni lo a, a rem dan ang anga thang chho niin insak leh inkalpawhna chungchangah pawh harsatna kan tawk nasa hle. Kan state capital Aizawl ngei pawh enkawltu mumal awm lova thang chho a ni a. Sawrkarin a enkawltu tur Aizawl Development Authority dinin hma an la a, a hnuah Aizawl Municipal Council dinin inenkawlna tha zawk a awm theihnan hma an la chho a. Ruahmanna awm mumal lova khawpui din chu ruahmanna felfai zawka a kal theih dan tur buaipuiin harsa takin hma an la a ni.

Mizoram mipui zatve deuh thaw hi Aizawla khawsa kan ni a, a theih ang angin kan in ek beng a. Hetia Aizawl kan bawh hum hum chhan ber hi eizawnna awlsam zawk a awm beisei vang a ni. Mipui cheng an tam vangin Aizawl khawpuiah hian hmasawnna hnathawh pawh a tam a, khawpui dangte pawhin an thik hial. State dangte pawhin khawpui lian hi an nei nual a, Mizoramah erawh chuan Aizawl han elpha hi an awm lo tluk a ni. Chuvangin hmasawnna kairual a awm theihnan leh Aizawl khawpui tawt lutuk tih ziaawmna atan Thenzawl Peace City hi hlawhtling ngei teh se.