Khawvel hmasawnna nasa tak thleng chho mek zel leh mihring pung zelah kumtin ramngaw nasa taka tih chereu a ni a. Khawvel chuap an tih mai Amazon ngaw pui pawh kum tin nasa taka thiat a ni a, hei vang hian khawvel a lum tulh tulh a. Mithiamte sawi danin Himalaya tlang dunga vur pawh nasa takin a tui a, hei hian tuifinriat chim chin pawh nasa takin a ti sang bawk a. Khawvel lum tual tual chu mithiamte buaipui a ni ta a, ramngaw kan thiah zel avangin tuihna a kangchat bawk a. Hetiang zela kan khawvel hi a kal chhoh chuan nakin lawkah kan chenna khawvel hi awm hleih theih loh khawpa lum a nih dawn bakah tui harsatna avangin kan la buai dawn niin an sawi.

Mizoram hi kan vanneih­na em em chu kan rama thing leh mau a la awm tha a, kan ram sik leh sa pawh a la nuam tawkin khawvel hmun danga mite pawhin nuam an ti a ni. Hetia sik leh sa nuam tak kan la neihna chhan hi thing leh mau, ramngaw kan la neih that vang a ni a, chuvangin ram nuam ni zel tur chuan kan ramngaw te kan humhalh deuh deuh hi a pawimawh hle. Kan ram thing leh mau te hi kan humhalh lo anih chuan nakina a tuartu tur chu keimahni bawk hi kan ni.

Mizoram sawrkar pawhin ramngaw siam pawimawhzia hriain kum 1998 vel atang khan hma a la tan a, kum 2014 atang khan kum tin June ni 11 chu thingphun uar ni 'Green Mizoram day' atan hman a ni ta a. Hriat theih chinah nikum thleng khan he ni hmannaah hian thing tiak 17,79,503 phun tawh niin thing tiak 29,74,318 sem a ni tawh bawk. Hetia a lan dan maiah chuan kan thing tiak phun leh sem atanga han chhut hi chuan kan ram hi ngaw dup tawh turah a ngaih theih a, mahse kan hman uar ang ai chuan hmasawnna hmuh tur erawh a tam lo hle thung.

Green Mizoram day hman tan tirh lai vel kha chuan sawrkar department hrang hrang te khan chan insem ten thingphun hnatlang an nei thin a, pisa chawl meuhin thing tiak an phun thin anih kha. Mahse khang thingphunte kha enkawl zui an hlawh tawk lo nge ni puitling an tam tawk lo hle a. A chang chuan thingphun ni te kha intihhlimna ni ang hiala hmang te an awm nia a lan vangin enkawl zui kawngah ngaihtuahna kan seng zui tawk lo deuh niin a lang. Engpawhnise thing hi an hlu a, kan phun belh deuh deuh zel tur a ni. Chutih rual chuan thingphun uar rikngawt a, a enkawl zui kawngah kan tha kan thlah leh si anih chuan awmze nei lova sum tam tak khawhralna a nei thei ang. Chuvangin thingphun hi uar ringawt lovin a enkawl zui kawngah tun aia nasa leh zuala tanlak hi kan tih ngei tur a ni.