ZALEN May 22, 2026 : School Education Minister Dr. Vanlalthlana chuan vawiin khan Aizawl Press Club-ah chanchinthar lakhawmtute hmaah school 52 bak provincialised an nih lo chhan a sawi a, 27.9.2023-a Council of Minister meeting in 'Upgradation of Schools' chungchanga a lo pawm tawh, tuna an dinhmun tih hniam sak leh te chungchang a sawifiah.

School Education Minister chuan 27.9.2023-a school upgradation atana Council of Ministers-in thutlukna an siam chu Department of Personnel & Administrative Reforms, Law & Judicial Department leh Finance department te hriatpuina tel lo a nih avangin 18.6.2024-a Council of Ministers thu khawm chuan a ngaihtuah tha a, 22.7.2023 notification anga 'criteria' pha lo school te chu hlan kai theih an nih loh thu a sawi.

27.9.2023-a Council of Minister meeting chuan 'Upgradation of Schools' hnuaiah hian School 340 a pawm a, heng zinga 180 chu Provincialisation niin, 52 chu Provisional Adhoc GiA niin 108 chu Lump sum GiA a hlankai an ni. Mahse, 18.5.2026-a Council of Ministers thukhawm chuan 22.7.2023 notification angin 'criteria' pha School 52 te chuah hi hlankai theih an ni, Education Minister chuan a ti.

Council of Ministers 18.5.2026-a meeting-in School 52 sawrkar school (Provincialised) atana a pawm te hi kum 2023-a notification hmanga criteria pha te an ni a, Special Blind School, Durtlang chiah criteria pha lo awmchhun a ni, Higher Secondary School zingah Ngopa-in Criteria (80% pass percentage leh enrollment 80/40) pha lovin pass percentage-a a phak lohna zawk hi ngaihdam a ni. Provincialised thar te hi Higher Secondary School - 12, High School - 34 leh Elementary School - 5 te an ni.