ZALEN February 10, 2026: MPCC chuan Mizoram hmun hrang hrang atanga report an dawn danin Electric Bill man a pung nasa hle a. Thla khata cheng 600/- chawi ṭhin ten tunah chuan cheng 7,000/- bawr velte chawiin cheng sangkhat pawh chawi tling ngailo ten cheng sing chuangte an chawi chu pawi an tiin a ngai thu tak hle an ti.

ZPM ten an Manifesto ah Electric Bill an tihsan ve loh tur thu a ziah bakah thla hmasa mai January ni 12, 2026 (Thawhṭanni) a ZPM Office hawnna inkhawmah Chief Minister Lalduhoma chuan, kumtinin Electric Bill hi a pung thin a. Sawrkar liam taah Unit khat man chu ₹5.83/- a ni a. Hei hi kan chhawm a. Kum 5 chhungin keini chuan Electric Bill hi kan tipung ve dawn lo a ni, tiin a sawi a. Tunah hian mipui rawka Sawrkar sum tuakna atan Electric Bill chu ZPM Sawrkarin a tisang ta vak mai hi a pawiin an intiamna ang leh CM Lalduhoma sawi ang ngeiin Unit khata ₹5.83/- a Bill siam tha leh turin MPCC chuan ZPM Sawrkar a hriattir.

ZPM Sawrkarin tuialhthei man a tihsan hnuah thil man a to phahin lirthei chuan man a to phah a, hei mai ni loin Ran Chhiah lak thin chu duh tawk loin Animal Registration fee a khawn a. Municipal hnuaia awm pawh nilo, Zoram dung leh vang a khaw hrang hrang a Property Tax a khawn ta mai hi mipui rawknaah MPCC chuan an ngai a ni. Electric chhit man sang chak lutuk hi MPCC chuan a tul angin an zir chiang dawn an ti a. MPCC ngenna leh hriattirna ngaipawimawh lova ZPM Sawrkarin Electric Bill a tisang lui a nih chuan mipuite thlavang hauh turin a tawp thlengin MPCC chu a che chhuak dawn an ti.