ZALEN August 10, 2026: Aizawl Electric Veng Branch YMA chuan veng chhung faina kawnga an hmalakna chhunzawm zelin, veng chhunga in tinah bawlhhlawh tawih thei leh tawih thei lo thliar hrang leh bawm neih dan survey neih an rel.

He hmalakna hi August ni 7, 2026 (Zirtawpni) zana Electric Veng Branch YMA Committee Meeting-a pawm a ni a. Aizawl Municipal Corporation (AMC)-in Solid Waste Management Centre (SWMC), Tuirial-a tawih thei atanga leitha a siam chhuahnaa tawih thei leh tawih thei lo inpawlh thin harsatna sukiang tura thawhpuina tura tih a ni.

SWMC, Tuirial-a bawlhhlawh paihnaah tawih thei zingah tawih thei lo fun pawlh a la awm thin avangin, ni khata khawl lamin leitha a siam chhuah theih zat a siam chhuak pha lo va. YMA thuthlung anga sawrkar leh ram roreltute hmalakna thawhpui zelna atan leh faina kawnga hma lak chhunzawm nan he survey hi buatsaih tura an rel a ni.

Electric Branch YMA hruaitute chuan, "Awmze neia sawrkar hmalakna thawhpui zelna atan te, faina kawnga hma kan lakna kal zelah in tinah tawih thei leh tawih thei lo bawm neih dan survey hi neih ni se tiin kan rel a ni," an ti. 

Veng chhung mite chauh ni lo, veng dang atanga chhiat ni that nia Electric Venga kalte leh veng chhung paltlangtute pawhin thil eina sarang, meizial bung, kuhva eina leh bawlhhlawh dang reng reng khawlaiah paih lo turin an ngen bawk.

Electric Veng Branch YMA hi kum liam ta khan UD&PA, AMC, Aizawl Smart City leh CYMA te'n faina intihsiak an buatsaihah pathumna an lo ni tawh a. Nikum khan veng chhung hmun 130 chuangah meizial bung leh kuhva eina hnu paihna an lo dah tawh bawk.