ZALEN, Mar. 27, 2026: Electric Veng Branch YMA chuan an lo tih thin tawh angin Zirtawpni zan khân an veng YMA Hall-ah YMA Chhang Zân an hmang leh a, ruihhlo that lohzia leh naupangte dikna chanvo an inzirtir.

YMA Chhangte hi Central YMA hnuaia din, Zone Anti Drugs Squad (ZADS Zone IV)-in ruihhlo that lohzia hi an zirtir a, social welfare department district child protection-in naupangte dikna leh chanvo chungchang an zirtir a, Mizoram Amateur Taekwondo Association (MATA)-in an hmanpui bawk.

YMA Chhangte hian hnam lâm chi hrang hrang - Tlanglâm, Sarlamkai leh Cheraw an entir a; Vakul chang Cultural Club, Electric Vengin hnam lâm an entir bawk.

Electric Veng Branch YMA hian naupangte sikul chawlh laiin an hun awl tha taka an hman theih nân YMA Chhang thiam zirna hun an buatsaih a. Culture & Music Sub-Committee leh Vakul Chang Cultural Club-in hnam lam, zo nun zemawi leh nun dan mawite an zirtir thin bawk.

He an hmalakna atan hian branch YMA chuan YMA Chhangte tan hian an hall leh indoor stadium chu thla khat chuang mi dangten an hawh theih lohin an khar a ni.

Electric Veng YMA hian kum 2024 leh 2025 khân YMA Chhang Zan hi an lo hmang tawh a. Hruaitu, nu leh pa leh naupangten an hlawkpuiin chhunzawm zel tlak niin an ngai.