ZALEN September 6, 2026: Mizoram State Project Monitoring Committee (MSPMC) chuan Eklavya Model Residential School, Tlungvel a sak mekah project hnathawh dan phu lo leka sum hlei hluak taka pek niin an sawi.

MSPMC hian Eklavya Model Residential School hi tum hnih an tlawh tawh a. A sak hna hi a chhe hle tih sawiin a ban (column) hi compressive strength, rebound hammer hmangin test vek a ni a, M20 turah a tling lo vek niin an sawi.

MSPMC chuan administrative building sak mekah building sak hian duhthu a sam lovin corridor a zim a, in chung slab atangin tui a hnâm reng tih an sawi. 

Hei bakah hian kangmei laka invenna dah a ni lo a, tui thianghlim in tur dah a ni lo bawk tih an sawi a. MSPMC chuan academic building hi design dik lo leh kim lo a awm nual tih sawiin zun in zim lutuk chu siam that ni se, inthiarna kawngkhar thehlep lutuk pawh a aia tha zawkin thlak nise tiin an rawt.

Boys & girls hostel-ah tui far leh hnâm avangin electrification fitting thlengin a tibuai tih MSPMC chuan an sawi a, inthiarna (toilet) kawngkhar chu a quality a chhe hle a, tukverh-ah tlak dalna (bar) a awm lo nia sawiin building chak zawng tur pawh a tling lo vek niin an sawi.

In sak hi a chhiain siam that ngai a tam a, plumbing a dik loh bakah pianphunga rualbanlote kalna tur (ramp)-ah tui a tling thei a, tlak dal (railing) pawh a chhe nghal tih an sawi.

Eirawngbawlna leh chaw eina hmun (kitchen/dining hall) chungchangah pawh enfiahna an neih hmasak (7.6.2024) a building kual chhuakin tui luanna (drain) siam tura tih pawh siam a la ni lo tih sawiin choka tuichhia chu mumal lo takin a luang niin an sawi a. 

Choka a boruak rimchhe chhuahna (exhaust fan) vuah tur pawh vuah a la ni lo tiin chhuat pawh a chhe nual tawh tih an sawi bawk. Hei bakah hian guest house, Principal quarters leh thawktute quarters pawhin duhthu a sam lo niin an sawi bawk.

MSPMC chuan he project a hna peng hrang hrangte hi specification tling lo/pha lo an ni deuh vek niin an sawi a, hmanrua leh work quality a chhia a, sub standard work a ni hlawm an ti a. 

Hetianga hna chhia leh kut tling lo tling pawma pawisa pek vak mai hi thil fel lo lian tak a ni a, thuneitu ten enzui thin se tiin an rawt a. Drawing & design chungchangah inmil lo a tam hle niin an sawi a. MSPMC ten an en lai hian technical paper pakhat mah hmuh tur a awm lo a, contractor in hna a thawhna ber tur BoQ (Bill of Quantity) awm lovin rinthuin hna lian lutuk a a thawk niin an sawi bawk.

MSPMC chuan hnathawh (physical achievement) 75% chauh anih laiin sum pek chhuah chu 94% a ni thung tih sawiin hnathawh loh bill siam lawk a, contractor hnena pek tam tham tak a awm ngei niin a lang tih an sawi a. 

Heti taka hna chhia anih bakah a hna kal chak lo lutuk hi a bul berah chuan nodal department te enkawl dan leh hna kal nena inhen lo taka sum pek chhuah tam hi harsatna thlentu ber a ni tiin thuneitu ten enzui se an duh tih an tarlang a.

 Building hi a him lo nia sawiin structural engineer kaih­hruaina hnuaiah siamthat (structural retrofit) hi contractor hian ama sum sengin ti tha leh vek se tih chu MSPMC inspecting team te duhdan a ni tih an tarlang bawk.

Eklavya Model Residential School, Tlungvel sakna atan hian Ministry of Tribal Affairs chuan Rs. vaibelchhe 24 a sanction a, vbc 23.3361 a sa turin VRS Construction, Zonuam Aizawl hnenah restricted tender hmangin December 20, 2019 khan work order pek a ni a. He hna zawh hun atan hian December 20, 2021 ruahman niin zawh hun tur hi tum hnih pawhsei a ni chungin hna hi 75% chauh thawh a la ni a, he ti chung hian sum hi 94% (Rs. 20,91,61,321) pek chhuah a ni tawh.

A sakna hmun hi hmun awl a ni a, a tirah Social Welfare department-in an enkawl a, April 1,2025 atangin Planning & Programme Implementation department ten an enkawl zawm a ni.