ZALEN August 12, 2026: Vawiin khan 'Mizoram Independence puan Diamond Jubilee Celebration Committee' hruaitute chuan, Mizo Hnam Runah Jubilee lawm programme kal zelah, zalenna suala lo fehchhuak pawl hrang hruaitute kawmin, hun an hmang.

Dr. R. Lalthangliana, Sr.Vice President & Chairman, Organising Committee chuan he hun hi a kaihruai a, Ex-Mizo National Army Association (Ex-MNA), Peace Accord MNF Returnee Association (PAMRA) leh Mizoram Underground Returnee Association (MURA) hruaitu te an kal a ni. Dr.Thangtea chuan, zalenna suala fehchhuakte chu lungrual taka Zofate Inpui MNF a hawkhawm a, neitu chan changtlang theuh tura ngenin, an theihna zawn theuha ram, hnam leh sakhaw humhim a, ti thangduang zel tura beiho turin a sawm.

Kalkhawmte chuan, Diamond Jubilee puala kohkhawm an ni leh, zalenna sualtute MNF-in hlut taka a kalpui reng thin lawmawm an tih thute sawiin, Jubilee lawmna programme kal zel turah pawh inpumkhatna leh thawhhona tha tak nen lungrual taka pen ho zel tha an tih thu an sawi. MNF-in Zalenna sual a, Mizoram tana engkim huama a beihna chu vawiinah thangtharte tan malsawmna nasa takin a thlen a. Ram leh hnam him zelna tur pawh thlenin, rohlu min hnutchhiah tam tak hi vawn nun a, vawn him zel a pawimawh a, thangtharte theihnghilh tawh loh tura Mizo Nationalism vawn nun zel hi a tul a ni, tiin hun hlimawm tak an hmang.

He hunah hian K. Vanlalauva, NCC ; K. Lalthawmmawia, Secretary & PAC; C. Lalramzauva, PAC & Chairman MNF Legal Board; VL Krosshnehzova, General Secy. leh hruaitu dangten telpuiin hun an hmang a ni.