ZALEN March 4, 2026: Vawiin khan Central Training Institute, Sesawng-ah 11th Batch, Excise & Narcotics, Basic Training zo te pualin 'Passing Out Parade' hun hman a ni a, Excise & Narcotics Minister Lalnghinglova Hmar chuan khuallian niin hun a hmanpui a, Adviser to Chief Minister Lalmuanpuia Punte-in khualzahawm niin a telpui bawk. Training hi September ni 1, 2025 atang khan neih tan a ni a; training chhuakte hi an vaiin mi 22 niin Sub-Inspector 12 leh Constable 10 an ni.

END Minister chuan Excise & Narcotics Department chu Chief Minister thlawpna hnuaiah department hmasawn berte zinga mi a nih thu a sawi a. Department-ah thawktu indaih lohna a nasat thin thu sawiin tun kum hnih kalta chhungin thawktu, mi thar 28 direct recruitment-a lak fel an nih tawh thu te, mi 41 lak belh lehna tur pawh buaipui mek a nih thu leh post thar pawh 16 siam a nih thu a sawi bawk.

Heng bakah hian District thar 3-ah Excise Station hawn thar a nih thu sawiin, Inspector awpna hnuaia awm thin kha Lawngtlai nen Assistant Commissioner awpna hnuaia an awm tawh tur thu a sawi a. Tunah Sairang leh Bairabi-ah Excise Station thar hawn phalna an nei leh tawh thu a sawi bawk.

END Minister chuan, "Excise & Narcotics Department-in tun hnaiah lirthei thar 21 an dawn thu sawi bawkin, ruihhlo dona tura sawrkar inbuatsaihna vek a nih thu a sawi a. Training chhuak tharte pawh theihtawp chhuah tura chahin 'Indo kan ni a, kan do lamah kan tan a thiang lo,' tiin tumah ruihhloa inhnamhnawih lo turin a chah bawk.

Lalmuanpuia Punte pawhin thu sawiin END a thawktu lak tharte chu Party induhsakna tel lova fair taka lak an nih thu a sawi a. Mahni inrintawkna nena tha taka hna thawk tura fuihin 'dan ang taka lak in nih angin dan ang taka thawk turin kan phutlet dawn cheu a ni,' a ti bawk.

Vawiin hun hmannaah END Commissioner Z. Lalhmangaiha bakah Department-a mi pawimawh eng emaw zat an tel a. CTI Commandant Lalrengpuia'n training chhuakte rinawmna thu tiamtirin, training neih chhunga ti tha zual mi 5 te hnenah END Minister-in lawmman a hlan bawk. END Joint Commissioner Peter Zohmingthanga'n lawmthu sawiin hun hi a khar a ni.

Lawmman latute leh an lawmman dawnte:

1. Minister of State Excise & Narcotics Award for Best All Rounder - Sub-Inspector K. Lalrohlua

2. Commandant General Award for Best Firer - C/692 Lalsangzuala

3. Commissioner & Secretary Excise & Narcotics Award for Best Turn Out - Sub-Inspector K. Lalrohlua

4. Commissioner Excise & Narcotics Award for Best Discipline - Sub-Inspector LP Lalruatsaka

5. Commandant, CTI Award for Best in Drill - Sub-Inspector David Lalrinsanga