ZALEN July 16, 2026: Mizoram Pradesh Congress Committee chuan July 21, 2026 chhun dar 12 hian Mizoram hmun hrang hrangah Foreign Contribution Regulation (Amendment) Bill (FCRA) leh India ram chhunga Kristian te tihduhdahna hluar zel duhlohna lantir nan 'Black Day' hman an tum.

Vawiina chanchinthar lakhawmtute an kawmnaah Congress chuan 'Black Day' hmang tur hian Kohhran hrang hrang te pawh sawmna an pek tawh thu an sawi a, he hun hmanpui tur leh thlawpa telpui theuh turin Zoram mipuite ngenin an sawm a. He dan hi Kristian te tana tha lo leh him lo a nih avangin MPCC chuan BJP kaihhruai sawrkarin Kristian te nekchepna hmanrua atana Foreign Contribution (Regulation) Amendment Bill, 2026 a chhawpchhuah chu a tawp thleng dodal an tum thu an sawi. 

MPCC chuan BJP kaihhruai sawrkarin Kristiante nekchepna hmanrua atana FCRA Bill 2026 a chhawpchhuak chu tha lo an ti. NGO leh Kristian pawl hrang hrang ten ram pawn lama Kristian te hnen atanga tanpuina pawisa an dawnah harsatna a siam phah niin an sawi.

BJP sawrkar hnu hian FCRA hnuaia license nei pawl 20,000 chuang chu an license tihtawp sak an ni tawh a, heng zingah hian Mizoram a pawlte pawh an tel an ti a, tunah hian Kohhran pakhat pawisa dawn tur pawh hren sak mek a ni, an ti. 

March ni 31, 1976 atanga khan FCRA hi hman tan a ni a, 1984 khan amendment siam a ni a, foreign fund te uluk zawka kalpui duhna avangin 2010 khan siam that leh a ni a, Kum 2020 khan BJP sawrkar chuan amendment siamin NGO leh Kohhran te foreign funding chu khirhkhan takin a kalpui a, Kristian te chu foreign fund dawng hnem ber an nih avangin he dan hman tum hian Kristian te a bitum riauin a ngaih theih a ni, an ti.