ZALEN February 8, 2026: Zo hnahthlak tam tak zingah ‘Israel/Juda thlah kan ni’ ti pawl an awm a, heng mite zingah hian Manashe thlah inti leh Ephraim-a thlah inti pawl an awm bawk a. Chutih rualin Juda thlah nia Mizote sawina hi dodal/awih lo pawl pawh an awm ve bawk.

Engpawhnise Juda thlah nia inngai leh an sakhaw vuantu mi eng emaw zat chu Israel ramah an pem (haw) tawh a, kan hma lawkah pawh hian kal leh tur mi eng emaw zat an awm bawk.

Thudawn danin tun thla chhung hian Mizoram chhunga Juda sakhaw zuitu, Bnei Menashe tia invuah mi 300 vel chu Israel-a pem thla turin an inbuatsaih mek a. Heng pem tum zinga mi pakhat ZALEN-in a kawm chuan, “A hun leh ni tak hi min la hrilh chiah lo a. Mahse February 10, 2026 hnu lamah chuan ‘inring rengin lo awm rawh u’ tiin min hrilh a. Tunah hian keini lam chu a tul huna kal mai thei turin kan in ring reng a ni,” a ti.

Israel sawrkar chuan kum 2030 ral hmain Mizoram leh Manipur-a Bnei Menashe (Mizo Juda) mi 6,000 chu an rama pem thlak a phalsak a. Bnei Menashe hruaitu pakhat chuan Israel-a Mizo (Juda) pemte tihduhdah leh hmun ralmuang lo laia dah an ni thin nia sawi chu thu dik lo niin a sawi bawk.

Israel rama pem tur hian paltlang ngai eng emaw zat a awm tih sawiin document chi hrang hrang bakah passport leh police tihchianna (verification) te a ngai a. Juda sakhaw hruaitu, Rabbi leh mi pawimawh dangte lo kalin pem duhte interview an neih hnuah kal thei turte hi tihchian thin a ni a. Duh duh kal mai lovin interview paltlang atangin a kal zat tur hi bituk a ni thin a, mipa an nih chuan serh tan tawh ngei an nih a ngaih bakah Juda sakhua a inlet tawh an nih a tul a. Hei bakah hian Juda sakhaw serh leh sang an hriat thuk zawngte nen enfiah an ni a. Israel an pem thlak atanga thla ruk nung passport neih a ngaih bakah Kristian an lo la ni ru reng em tihte pawh chik taka zir chian thin a ni.

Kan hma lawka Israel pem turte hi December, 2025-a interview paltlangte nia thudawn a ni.

Bnei Menashe hruaitu pakhatin ZALEN a hrilh danin kum 1989 atang khan Israel-ah hian pem tan a ni a, tuna pem turte hmaa pem hnuhnung ber chu kum 2020 kha niin hmalak leh mai a nih loh chhan chu sawrkar laipui lamah mi thenkhatten complaint an thlen vang niin a sawi.

Juda sakhaw zuitu, Bnei Menashe hi India, Bangladesh leh Myanmar-a chengte niin Israel hnam boa inngai an ni a, an vai hian mi 10,000 vel nia ngaih a ni.

Thudawn danin heng mite hi a hma chuan Kristian sakhaw zuitute an ni a; mahse, Juda sakhuaah inletin anmahni hi Chin, Kuki leh Mizo hnam an ni.

Kum zabi 20-na tawp lam khan Israel rabbi, Eliyahu Avichail chuan heng hnam bo inti, Juda sakhaw vuantute hi Bnei Menashe tiin an hming a vuah a. DNA test neihnaah chuan Israel-te nen an inanna hmuh a ni lo a, chutih rual chuan kum 100 eng emaw zat mi dangte nen an inneih pawlh tawh avangin DNA hi a danglam thei nia sawi a ni bawk.