ZALEN March 1, 2026: Ram hrang hrang hian khawvel hriata hming chherna an nei duh vek a, mi nazawng hi chuan heng ramten hming an chherna hi kan hriatpui vek kher lo. India rama state hriat hlawh, state ralmuang lo bera ngaih, Kashmir chuan ram ralmuang lo tak an ni chungin an silk atanga siam shawl leh carpet an larpui thei reng a. Apple leh walnut (khawkherh) te pawh an tharchhuah chanve tharchhuak an awm lo.

Mizote pawhin Kashmir Shawl leh Kashmir Carpet te hi kan hmelhriat em em a, Kashmir silk atanga siam shawl-te hi kan hmeichhiaten an bat nasa a, India-a hill station larho pawhin an thil zawrh zinga an chhuan em em thin chu Kashmiri shawl leh carpet te tho hi a ni. Heng shawl leh carpet-te hi chu khawl hmanga siam an ni a, Kashmir sawrkar leh mipuiten an ngaihhlut shawl leh carpet te erawh a mi nazawngin kan hmuh ang hi a ni lo.

Ministry of Information & Broadcasting, Government of India hnuaia Press Information Bureau (PIB) buatsaiha Mizoram chanchinbumiten tun hnaia Kashmir an tlawhnaah Kashmir sawrkar chuan thingtheihmu (mulberry) atanga silk an buatsaihna hmun leh Ladakh hmuna cheng bik beram chi khat, pashmina hmul atanga silk an siam buaipuina hmun bakah hemi atanga shawl leh carpet siam a nih dante an hrilh a, an buaipuina hmunte an hmuhpui bawk.

Kashmir sawrkarin silk a buaipui dan leh sumdawnna atana silk hmanga khawla shawl leh carpet an siamte chu a danglam hle a, khawl hmanga siam silk chu man tlawm tak taka lei theih tura hmuh tur a awm laiin an shawl leh carpet ngaihhlut em em, khawvela pawhin a ngaihhlutpuite erawh hi chu mi naran a lo thleng pha dawn lo tih a chiang em em a. Heng mihring kut hmanga siam shawl leh carpet-te hi hmuh mai mai tur a awm lo a, a man tlawm hote phei hi chu a hlutna hre lo tan phei chuan ho ang reng tak a ni.

Heng kut hmanga phiar shawl leh carpet an tahte hi a phiartu thiamna leh phiar hun chhung azirin a man chhiar a ni a. Silk la zai, thingtheihmu leh pashmina hmul atanga siamte chu kut hmangin khawla tah a nih hnuah kut hmangin an thui par (design) ta thin a, a design siam chhung hian hun a duh hle a, kum sarih chhung an thui par shawl-te pawh a awm, kum khat chhung siam te, thla hnih khat lek siam te pawh a awm tho a, an buaipui chhung a zirin a shawl leh carpet man te hi an chhiar ta thin a ni.

Kum khat chhung shawl hi siam ta se, kum khatah ni 365 a awm a, phiar loh ni leh harsatna dangte awm thei a nih avangin a buaipui chhung hi ni 300 ang vela chhut thin a ni a, hlawhfa chu thiam pangngai tak a nih chuan ni khatah Rs. 500 hlawh angin an chhut a, chuti a nih chuan he shawl hi 500 x 300 = 1,50,000 man tur tihna a ni a. Chutiang zelin shawl siam hun azirin a man hi an chhut a. Chutiang bawkin carpet pawh a man an chhiar.

Srinagar-a kut hmanga shawl leh carpet siamtu hriat hlawh, kum 200 chuang shawl siam lo kalpui tawh, Ambani chhungkua pawhin an shawl siam an lo leisak tawh, Beigh family chuan an shawl tah zawhte chu Jhelum luiah an suk phawt thin thu ZALEN an hrilh a, he lui luangin vei lam leh ding lam zawnga an shawl a sawp kual hnu chuan a da tur ang a da vek a, a dak belh tawh ngai lo niin an sawi.

Kashmir sawrkar hotute chuan kut hmanga siam shawl leh carpet-te hi a to tham avangin ram chhungah chuan an hralh tam lo an ti a, Middle East leh Russia bakah Europe ramho chu an hralh tamna ber an nih thu an sawi bawk.