Sawrkar laipuiin November ni 8,2016 atanga pawisa note lian pahnih Rs. 500 leh Rs. 1000 note a tih thih chuan nghawng a nei chho zel a. Parliament ah rorel hleithei lova an awm mek lai leh he thilthleng avanga mi tam tak a intihhlum lai te; mithiam tam takin India economy a tha zawnga a nghawng dawn nia an sawi lai leh thenkhatin an sawisel laiin Mizoram ah pawh nghawng a nei lian hle. Mizoram ah chuan pawisa tih thih hian sawrkar a nghawng na ber mai awm mang e a tih theih a. Tun thlengin Bank lam chuan ni khatah department khat te chu Rs. 24000 bak an pek theihloh avangin an buai hle a. Treasury lam pawhin bill liantham kal tir thei lovin bill thahnem tak an kawl mek. Sawrkar hnathawk liantak pakhat chuan an hlawh chu Account ah lut ngei mahse ni khatah lakchhuah zat bituk a awm avangin a buaithlak hle tih a sawi a. In luah man, awmpui hlawh, bill chi hrang hrang pe tur chuan ni engemaw zat bank dawr a ngai niin a sawi. Hnathawk mi 10 vel chhawrtu sumdawng pakhat chuan an hnathawkte hlawh chu bank account ah an dah avangin harsatna an nei lemlo a, mahse bungraw tam tham an lei dawn erawh chuan mi thenkhat a pawisa fai ngeia dawn duh an awm avangin harsatna an nei tih a sawi. Sawrkar atanga pension tawh pakhat chuan kar khatah Rs. 24000 a lak theih avangin harsatna em em an tawklo tih a sawi a, sum lakchhuah phalchin a awm chu pawisa ren phah nan an hmang hlauh niin a sawi bawk.