ZALEN September 27, 2026: Mizoramah zu leh ruihhlo a hluar a, a bikin ruihhlo ti thinte avangin kan khawpui ber, Aizawl pawh a tawp phah hle. Aizawl hmun laili leh pawimawh zinga mi, Pisa tlang (Treasury Square) leh a chhehvelah ruihhlo ti thin an fuankhawm nasa thin hle a, hei hian rukruk leh sualna dang keng telin hmeichhia, tar leh chak lo zawkte tan a him lo a. Mipuite thlamuang taka an awm theih nan leh helai vel a lo thianghlim zawk nan Venghlui khawtlang mi pawimawhte chu Pisa tlang chheh velah hian an duty thin a, kum sarih zet duty hi an kalpui tawh a, anmahni vangin helai hmun pawh a thianghlim phah hle.

‘Venghlui Paho Zing Duty’ tia hriatte hi July 27, 2019 atang khan Pisa tlang leh a chhehvelah hian an duty tan a, an duty chhan ber chu helai chhehvel tawp lutuk leh ruihhlo ti thinten fuankhawmna atan an hmang chu a tha lo nia an hriat vang a ni a. A tirah chuan YMA leh Hmar Veng Welfare tangkawpten bul tanin a hnu zelah veng chhung mi tlawmngaiten an chhunzawm ta a ni.

Tun dinhmunah tlawmngaia duty chhuak thin hi mi 15 vel an awm a, duty thin zingah hian minister hlui, local council, branch YMA office bearer ni lai leh chawl tawh te, kohhran upa ni mek te an tel a ni.

ZALEN zawhna chhangin Venghlui Paho Zing Duty chuan Pisa tlang chhehvela ruihhlo ti thinte chu hnawt darhin a then chu police leh excise kutah hlanin home-a dah pawh an nei nual tawh tih an sawi a. Damdawi leh zu pawh eng emaw zat an mansak tawh tih sawiin helai chhehvela an duty chhan ber chu Aizawl khawpui a lo thianghlim zawk nan leh mipuite thlamuang taka an awm theihna atan a ni tih an sawi a. Duty chu chhunzawm zel an tum tih sawiin a hma aia nasa zawka tan lak chhunzawm zel an tum tih an sawi bawk.

Zing kara duty thinte hi mi tlawmngai eng emaw zat chuan an zing thingpui inna te an lo tumsak tawh thin a, hei mai bakah anmahni duty thinho atangin zing thingpui inna man hi tlawmngaiten an pe thin bawk a. Aizawl District Bawrhsap Er. Lalhriatpuia, IAS chuan tun hnai khan Treasury Square leh a chhehvela chhum lo chat lova ruihhlo leh sual rem theih nana lo duty tawh mi 15-te hi lengah sawmin an inpekna an ngaihhlutzia lantir nan chawimawina thuziak (Letter of Appreciation) a hlan bakah an thingpui inna tur Rs. 15,000 a hlan bawk a. February 20, 2020 khan Aizawl SP chuan an duty avanga lawmthu sawina thuziak a lo hlan tawh bawk.

Treasury Square-a dawrkai pakhat chuan zing duty thinte hnathawh chu fakawm a tih thu a sawi a. “Tun hma chuan addict-ho hi an vak sup sup mai a, kan thil zawrhte pawh a bo ngun khawp mai. Mahse, duty an awm hnu hi chuan damdawi ti thinho hi an ralti a, kan thil bo thin pawh a ziaawm tawh a. Tun dinhmunah chuan zing karah chauh hian an duty a, hei ai hian han duty tam lehzual thei se ka ti hle a ni,” tiin ZALEN a hrilh.

Treasury Square chhehvel bakah Vana Pa Hall chhehvel leh Zodin square velah hian damdawi ti thin hi an fuankhawm nasa thei hle a. Tun hnai hun eng emaw chen atang khan Vana Pa Hall leh Zodin Square chhehvelah hian Tuikual South atangin mi tlawmngai, Central YMA president hlui, Vanlalruata leh a thiante an duty thin bawk.

An hmalakna avang hian damdawi ti thin leh hmeichhe awm tha duh lote an tawmim hle a. Dan leh thupek kengkawhtu police leh excise & narcotics-ten helai chhehvel hi tun ai hian vil uluk se an duh tih helai chhehvela awmte chuan an sawi bawk.