Khawvel hnam hrang hrang hian kût chi hrang hrang an nei a, heng an kût neihte hi nuam leh uar takin an hmang thin a. Khawvela kût (festival) lar zual zingah chuan Rio Carnival, Sapporo Snow Festival Japan, Mardi Gras New Orleans leh Las Fallas Spain te hi hriat hlawh zual zinga mi an ni.

India ramah pawh festival chi hrang hrang a tam hle a, a bikin thlasik laia an hman zinga lar zualte chu Lohri, Pongal, Ram Mahotsav, Diwali, Krismas, The Goa Carnival, Mount Abu Winter Festival, Elephant Festival (Rajasthan), Holi, Ziro Festival, Hornbill Festival te an ni awm e.

Mizoramah pawh kût chi hrang hrang kan nei a, chung zinga kan hman lar leh uar ber chu Chapchar Kût hi a ni a. Kumt in March chawlhkar hmasa ber Zirtawpniah hman thin a ni a. Chapchar Kût bakah hian kan pi leh pu atanga kan chhawm, Mim Kût leh Pawl Kût te a awm a; mahse, heng kût pahnih dangte erawh hi chu kan hmang uar lutuk lo thung.

Tun hnai hun eng emaw chen atang khan sawrkar laipui atanga sum kan hmuh hmangin festival hman thin a ni a, heng zingah hian Anthurium Festival chu a lar hle a. Anthurium Festival bakah tourism department chuan tun kar Thawhtanni atanga Inrinni thleng hian Lammual-ah Winter Festival huaihawt an tum.

Tourism department ruahman dan chuan Winter Festival hawnna hi naktuk chawhnu lam hian Lammual-ah neih tum niin Tourism Secretary Dr. Lalrozama, IAS-in a hawng ang a, a kharna hun December 16, 2023 (Inrinni)-ah chuan tourism minister thar chu khuallian atan beisei a ni.

ZALEN zawhna chhangin Tourism Deputy Secretary Zonunthari chuan Winter Festival huaihawtna tur sum chu sawrkar laipui atanga lokal a ni tih sawiin state sawrkar pawhin tum ve tur tlem azawng a nei tih a sawi a. Festival khuhhawnna atana zaithiam lar, Vengaboys chah chhuah an tum chu khaw awm danin a zir loh avangin an rawn tum thei lo a; chuvangin, concert an nei thei lo tih a sawi.

Tourism deputy secretary chuan Winter Festival an buatsaih chhan pakhat chu nikum lama an department-in Lammuala International Toursim Mart an buatsaih kha sumdawng leh thilsiamtuten an hlawkpui a; chuvangin, kuminah pawh hetiang hi buatsaih leh an ni tih a sawi.

Festival hi ni tin neih a ni dawn a, chawhnu leh zan lamah darkar hnih vel official function neih a ni ang a, stall-te erawh zan dar 10 thleng an inhawng thin dawn niin a sawi bawk.

Winter Festival 2023 cum Mega Exhibition-ah hian stall hrang hrang buatsaih a ni dawn a. Mit leh beng titlai tak tak live concert, Cosplay bakah variety programme nuam tak tak awm tura ruahman a ni.