ZALEN January 13, 2026: District Agriculture Marketing Committee (DAMC) Kolasib District chu Vawiin khan an Chairman Robert C. Lalhmangaiha hovin an thukhawm a, kumin 2026 a Kuthnathawktu te tharchhuah Hmunphiah leh Sawhthing lei dan tur leh ruahmanna te an thlir ho a. Sawrkar ruahmanna angin kumin February ni 2 atanga May ni 30 thleng Kolasib district ah Sawhthing lei tum a nih thu sawi a ni.

He hunah hian DAMC Kolasib district Member Secretary Joseph Lalnuntluanga Member Secretary chuan report pe in sawrkar ruahmanna a Sawhthing leh hmunphiah lei tura ruahmanna an siam dan te sawiin, hei bakah hian nikum 2025 khan sawrkarin Kuthnathawktu te Buh tharchhuah Quintal 1472 a lei thu leh kumin ah pawh Buhhum Quintal 350 an lei leh tawh thu sawiin, tunkar ah pawh buhhum lei hi an chhunzawm leh tur thu a sawi bawk.

Joseph Lalnuntluanga DAO/ Member Secretary DAMC Kolasib chuan Sawrkar ruahmanna angin kumin February ni 2 atanga May ni 30 thleng Kolasib district ah Sawhthing leh hmunphiah lei a nih tur thu sawiin, Primary Society member te tharchhuah ah chauh leh SCC a an lak theih hun chhunga hralh te chauh sorkarin Price support a pek tur thu te sawiin, Hmunphiah ro chu grade thliar lovin Kg1 Rs 80/- in ZOHANDCO in an lei tur thu leh, hmundanga hralh duh zawk an awm pawhin kuthnathawktu ten an duh duhna hmunah an hralh theih tur thu te a tar lang bawk.