ZALEN March 25, 2026: Mizoram Universal Heathcare Scheme (MUHCS) 1.0-a Pensioner ten hamthatna an neih ang MUHCS 2.0-a an neih tak loh chhan vawiin hian Finance Department te chuan an sawifiah a, Pensioner te pawisa thawh leh an hmanral a inthlauh lutuk avanga he scheme a pensioner te dinhmun hi tih danglam a nih thu an sawi.

Finance Commissioner Ramchuana, MF&AS chuan Pensioner te nena indawrna hrang hrang neih a nih hnuah MUHCS 1.0 hnuaiah duhsak takin scheme siamsak an ni a, an duh thua zawm turin ruahmanna siam a ni, an duhdan zulzuiin Category A leh B-ah then an ni a, Category A chuan thla tin Rs. 1000 thawhin kum khatah Nuai 12 thleng a thlawin an inekawl thei a, Private Cabin-ah an awm thei bawk. category B te erawh chuan Rs. 500 thla tin thawhin an senso nuai 5 thleng tum sak theih an ni a. Semi private ward pek theih an ni a, damlo zin veivahna pek sak theih a ni, a ti.

Hetiang scheme tha siamsak an nih lai hian an zavaia zawm tura beisei an ni a, mahse, pensioner mi 37,000 velah 10,400 vel chauhin an zawm a. Tun dinhmunah hian pensioner te inenkawlna senso hi Vbc 26.84 tling tawhin dam lo pakhat tana senso hi chawhrualin pensioner te hi a sang ber a ni. Hetihlai hian April 2025 atanga February 2026 thlenga pensioner te sum thawhkhawm tling khawm hi Vbc 9.33 chauh a nih thu Finance Commissioner chuan a sawi.

February 16, 2026-a Mizoram State Healthcare Society Governing Body Meeting chuan pensioner category bik dinhmun enin a pumpui thua enrolment enin pensioner category hi thlir a ni a, sawrkarin sum tam zawk a hmuh theihna turin MUHCS 2.0-ah hian pensioner te hi General Contributory Benificiary dinhmun atanga lak hran hlawk tha a ti a, chumi ang chuan Finance Department hian OM a chhuah ta a ni. Fixed MA erawh surrender kher loin an Fixed MA lak ang zat kha subscription fee-ah an hmang thung ang a, chu bak monthly contribution erawh pek belh a ngai tawh lo thung a ni.

MUHCS 1.0 -ah kha chuan pensioner te hian an chhungkaw member an kep theih zat kha Ration Card-a awm ang ang, an tu leh fate nen lam huamtir vek a ni a. Sawrkar hnathawk te pawh an chhungkaw member zawng zawng huamtir a nih loh laia pensioner te chhungkua, ration card anga huamtir vek kha a dik lo a ni, Finance Department lam hotute chuan an ti.

Finance lam chuan Pensioner te puala scheme kalpui tum hi pensioner lamin an duh lo a nih chuan pensioner te puala scheme siam kher hi a tulin a lang lo an ti a, FMA la bawk, MUHCS hlawkna dawn bawk a dual benefit neih hi a remin a lang lo a. MUHCS hi scheme dang hmanga an zawm dawn a nih chuan FMA an surrender a ngai dawn niin a lang, an ti.