ZALEN, May 15, 2025: Indian Super League 2024-25 champion, Mohun Bagan SG inghahna, Lalengmawia (Apui) Ralte chuan, “Footballer nih tum naupang zawkte tan nu leh pa thu awih a pawimawh ber ka ti,” a ti.

Ningani khan Sports Minister Lalnghinglova Hmar, Aizawl West II MLA chuan a bial chhunga football-a hlawhtlinna chang pahnihte chu MINECO-a a pisaah chawimawina a hlan a. Vaivakawn tlangval leh Super Cup 2025-a Goa FC champion-puitu, Ayush Dev Chhetri, Dinthar te hnenah thu ziak leh Rs. 10,000 a hlan.

He hunah hian Apuia chuan footballer nih tum naupang zawkte tan nu leh pa thu awih a pawimawh ber a tih thu a sawi a. “Anni aia min hmangaihtu an awm lo va, malsawmna kengtu a ni,” a ti.

India tana vawi 24 inkhel tawh, Apuia chuan football-ah chuan inzirna hmun (academy) thaa awm chu tha ber ni mah se a pawimawh ber chu mahni inzir zau peih a nih thu sawiin, “Awm ve theih loh pawhin mahniin a beih tlat theih a ni,” a ti.

Football lovah pawh engkimah theihtawp chhuah a pawimawh tih sawiin, “Mi dangten an tih bakte, an tih ve loh laia tih hram hramte hian rah tha a keng thin,” a ti a. “Malsawm tlaka nun kan hmasak a pawimawh a, Pathian pawhin mal a sawm duh niin ka hria,” a ti bawk.

Chawimawina a dawn chungchang sawiin Apuia chuan, “ISL kan champion a ni emaw, India tana kan khelh pawhin, mahni state sports minister-in lawmpuina hun an hmanpui hi hmun dangah a awm ngai pawhin ka hre lova, kan sports minister chungah lawmthu ka sawi,” a ti. 

Apuia hian 2024-25 season khan club tan inelna hrang hrangah vawi 27 khelin heng zinga 25 hi inkhel bul atanga a khelh niin ISL nomawi an laknaah an player pawimawh ber pawl niin playoff-ah final an luhna tur goal a khung nghe nghe.

He hunah hian FC Goa midfielder Chhetri chuan an puala lawmpuina hun hman a ni chu lawmawm a tih thu a sawi ve bawk a. Dinthar tlangval hi tun season-ah inelna hrang hrangah vawi 26 a inkhel a, goal khat khungin club tana a chet that avangin tun hnaia India-in Maldives an hmachhawn tum khan a inlan nghe nghe.

Sports minister chuan footballer pahnihte chu chawimawi an phu tih sawiin Mizoram atanga anmahni a insual chhuak an nih thu a sawi a, “Mi dangte pawhin an ti ve thei a ni tih a takin an lantir a ni,” a ti.

Aizawl West II bialtu hian a bial chhung atanga hlawhtlinna nei an awm chu a lawm thu a sawi a, naupang zawkte entawn tura awm zel turin a fuih bawk.

Footballer hlawhtlingte lawmpuina hunah hian footballer-te leh an chhungte bakah Mizoram Football Association hruaitu, sawm bikte leh chanchinbu mite an tel.