ZALEN June 27, 2026 : Vawiin chawhma dar 9:20 vel khan Freddy Lalruatfela (22) Maubawk veng chu eirawngbawlna gas bur ruak phurh an remfelnaah current-in manin a thi .

Thudawn danin Freddy-a putea hi Zoland Gas Agency, Haulawng te gas phur truck khalhtu a ni a. Tukin khan Haulawng atangin Aizawl rawn thlengin, Hunthar leitlahniam a thlen chuan Freddy-a hi phone-in chawhmeh a hawn thu leh amah chu hruai turin a hrilh a.

Freddy-a chuan truck-a gas bur ruak phurhte chu a remfel pui a, truck tailboard (a hnung kharna) an khar tha leh tur, tailboard tihnghehna atana hman thir tlawn a lek chhuak chu a chung lawka electric hrui chu a tawk palh a, current hian a man a, a hmunah hian a thi nghal a ni 

Truck body-ah hian electric current chu kalin truck ke chu a ti kang zui ta bawk niin thudawnna chuan a sawi.  

Freddy ruang hi vawiin khan Civil Hospital lamah postmortem a ni a, zaninah an veng Maubawk-ah lumen a ni anga, Pathianni chhun dar 12 ah vui a ni ang.