ZALEN September 20, 2026: Mihringte hian nunna atan thil pawimawh bik kan nei a, chung zinga pawimawh tak chu tui hi a ni a. Sawrkar chuan mipuiten tui hnianghnar kan neih theihna atan nasa takin hma a la thin a, Mizoram khawpui ber, Aizawl pawhin kan neih theihna atan kan khawpui kiang maia luang, Tlawng lui chu pump thin a. Tlawng tui hi hmun thum, Reiek kai hmun hnih leh Setlak luiah pump niin heng khawl pathumten harsatna awm lova hna an thawh chuan khawpui pawhin hnianghnar takin tui kan hmu thei a. Mahse, tun dinhmunah phase I leh phase II atanga tui pump theih a nih rih loh avangin harsatna a thleng tan mek.

PHE thuchhuah tar lan danin Aizawl tui lakna siam hmasak ber, Greater Aizawl Water Supply Scheme (GAWSS) Phase I, Reiek kaia mi chu kum 2024-a Cyclone Remal thawka tui lianah tui pump-na in (pump house) chu nasa taka chimin khawl leh hmanraw dangte a tichhia a. Tui lianin a chim tawh loh nan tui pump khawlte tui chim phak lohah dah san hna thawh mek niin hei vang hian May 30, 2026 atangin tui a pump theih a ni lo tih an sawi.

GAWSS Phase I siam hna hi ngawrh taka thawh mek niin a chanve vel thawh zawh tawh niin nakum thalah chuan zawh hman beisei a ni.

GAWSS Phase I atang hian tui pump theih loh mah se phase II leh phase III atanga a pump theih thin avangin harsatna lian tham a awm lo va; mahse, tun hnaiah phase II atang hian tui pump theih a nih loh avangin Aizawl khawpui hmun thenkhatah harsatna a thleng tan mek.

ZALEN zawhna chhangin PHE thawktute chuan, “Phase I chhe mah se phase II leh phase III atanga harsatna awm lova tui kan pek theih lai kha chuan consumer pakhat hnenah tui liter 3,500 vel zelin ni 10 dan velah kan sem thei a. Mahse, tun dinhmunah erawh phase III atang chauha tui kan pump theih hrih avangin harsatna kan tawk ta deuh a. Phase II siam that hna hi ngawrh takin kan thawk mek a, harsatna dang a awm loh chuan tui hi chu hniang­hnarin pe thei lo mah ila a ziaawm leh thuai kan beisei a ni,” an ti.

Tui pump kawnga harsatna a thlen chuan nghawng thui tak a nei thin tih sawi bawkin PHE thawktute chuan, “Ni 10 dan vela tui kan sem lai chuan mipui pawhin mamawh an nei tlem a, kan kal zung zung thei a. Mahse, a sem hun a tlai hian kan mamawhna a lo sang tawh thin a, ni danga tui liter 1,500 vel mamawhte khan a aia tam daih an lo mamawh tawh a. Kan pump theih a tlem bawk si avangin harsatna hi a thleng ta thin a ni,” an ti.

Tun hnaia tui pump kawnga harsatna dang thleng chu tui nu vang niin an sawi bawk a, “Kan tui pump-na ber, Tlawng tui hi a chang chuan a nu lutuk thin a, hetiang a nih chuan thlitfim a harsa a. Ni hnih khat lek pawh hetianga a awm chuan kan routine a buai lo thei lo a, kan ruahman sa angin tui pawh kan sem thei thin lo a ni,” an ti a. Tlawng nut chhan chu hmasawnna hnathawh vang leh mi thenkhatten leivung an paih thin vang nia an hriat thu an sawi bawk.

Aizawl khawpui chawmtu GAWSS Phase I atang hian ni tin tui million litre 10.8 vel a pump/siam chhuak thei a, kum 1988 khan hawn a ni. GAWSS Phase II atang hian ni tin tui million litre 24 vel a pump chhuak thei bawk a, hei hi kum 2007 a hawn a ni bawk a. Hei bakah hian GAWSS Phase III atang hian nitin tui liter maktaduai 37 pump chhuak thei a ni bawk. Mahse heng Aizawl tuilakna te hi an pump thei zat sang ber ang hian hman an ni ngai lo a ni.

PHE thawktute sawi danin eng emaw bik harsatna a awm a nih loh chuan ni tina tui 34 mld vel an pump hian Aizawl khawpui chuan hnianghnarin tui a hmu thei a; mahse, tun dinhmunah chuan phase III atang chauhin pump theih a ni a. Tunlai hian ni khatah 12 mld vel an pump mek nia thudawn a ni.

Hetih lai hian pa pakhat chuan tui chungchangah sawrkar (PHE) kuta mipuite kan innghat lutuk leh tui sem chungchanga harsatna a awm changa mipui kan buai fo mai chu dik lo a tih thu a sawi ve thung.

“Mizoram hi kan vannei a, sik leh sa a nawm bakah Pathianin ruah tui tha tak min pe a. Fur lai phei chuan kan hman sen loha tam ruah tui kan dawng a, heng kan ruah tui dawnte hi khawl nachang hria ila chuan tui hnianghnar takin kan nei thei dawn a. Tui pump kawngah sawrkar pawhin harsatna tawk mahse kan phili buai chuk fo thin hi a reh dawn a ni,” tiin ZALEN a hrilh bawk.