ZALEN Oct. 27, 2025 : Guwahati Mizo Welfare Association (GMWA) chuan thuchhuah siamin, Sairang – Guwahati inkarah rel a service hnuah Guwahati-ah Mizo zin an pun chhoh thu tarlangin, Guwahati-a zin turte chu Mizo awm nghet leh hnathawh emaw zirna emaw avanga awmte tana harsatna thlentu ni lo turin an ngen.

Guwahati Mizo Welfare Association chuan Guwahati hi North East State hrang hrangte kawtchhuah a nih avangin, state hrang hrang atanga helaia awmhmun bengbel hi an thahnem hle tih tarlangin, ‘Ram neitute hi rilru zau leh hnamdangte hriatthiamna ngah tak mai an ni a.

Ramri lama buaina a han chhuah zauh chang pawh hian Guwahati-a Mizo awm hi nekchepin an awm ngai lo a, hei hian helai Guwahati mipui rilru puthmang chu fiah takin a tarlang nia an hriat thu an tarlang a. Guwahati hi khawpui ralmuang leh chenna nuam, hnathawhna leh zirna atan pawha khawpui chhenfakawm a ni tih an tarlang.

Zu leh ruihhlo dang avanga buai a, kutbenga awm emaw police lamin an lo man emaw te vawi duai lo an buaipui tawh tih tarlangin, GMWA chuan, ‘Zoram lamah an lo thawn haw tawh thin a. Hetiang ang ti mite hian hnam hmel an tibal mai ni loin, helaia Mizo awmte tan thleng pawha harsatna leh buaina an thlen thin avangin Guwahati-ah hian zu leh ruihhlo danga in sum thei lo mi, harsatna leh buaina thlen tur chu tla lut lo turin an ngen a, sumdawnna biru leh dan kalh ang chite Guwahati-ah buaipui lo turin an chah bawl.

GMWA chuan Guwahati-a tute’n emaw hnathawh tur an sawi hmuh avanga kal tumte tan rintlak a nih leh nih loh chian hmasa turin an ngen a. Rela zin veivak mite tan rel chawlhhmun leh rel chhungah pawh mi bumhmang an awm thin tih hria-in, hmelhriat ngai loh lakah fimkhur turin an inchah.

Guwahati-ah hian Mizoram House mai bakah Mizo Khualbuk thlenna tur tha tak tak a awm. He’ng te hi Guwahati lo zin tur chuan hman tangkai ni se tiin, Guwahati-a harsatna tawk palh chuan a rang thei ang bera GMWA hnenah thlen thuai turin an ngen a ni.

#ZalenNews