ZALEN September 20, 2026: Higher & Technical Education department chuan Associate Professor leh Professor 8 hnenah an thawh loh hlawh (who did not perform their official duty) cheng vaibelchhe 3.88 a pe niin CAG report chuan a tarlang.

Comptroller & Auditor General of India report August 27,2026 a Mizoram Legislative Assembly a pharh takin a tarlan danin Government Kolasib College chhinchhiahna atanga a lan danin an office hnathawk pakhat chu a hlawh tihtlem (cut) sakin chumi pawisa hmang chuan hnathawk dang phalna awm lovin lak a ni a. Aikal hlawh atan hian Rs. 20,000, Rs. 30,000 leh Rs. 50,000 te laksak (deducted) niin chung pawisa chu March, 2017 atanga July, 2024 (February leh March, 2019 tih loh) chhungin a aiawh hnenah pek a ni. 

He thilah hian college thuneitute hian thuneitu sang atangin hlawh cut remtihna an lak loh bakah hetianga mahni thua zirtirtu lak phalna hi an nei lo a. He thilah hian sawrkar hnathawk nghet zawk chu hnathawk chuang si lovin a hlawh chu eng emaw zat a la reng a, hnathawk lova hlawh a lak hi vaibelchhe 2.02 a tling a, hei hi dan bawhchhiatna niin CAG chuan a tarlang. Report tarlan danin dan lova thawktu an rawihna atan hian cheng nuai 25.80 hman a ni.

CAG report chuan he thilthleng chungchang hi July 2024 khan Higher & Technical Education hotute pawh hriattir an niin October ni 14, 2024 khan he thil thleng hi Joint Director chhui tir a ni a. Department hotute chuan he thil hi inrintawnna avang leh he college-a Chemistry zirlaite hmakhaw ngaihna avanga tih niin an tarlang a. Kolasib College-a Chemistry zirtirtu chu February ni 2,2001 khan chesualin a lu a sawh a, hei vang hian a hna a thawh that theih loh vanga hetianga College thuneitu lam pawhin hma la ta mai niin an sawi bakah Associate Professor pawh hi chawlhtir (voluntary retirement) tura hma an lak mek thu an sawi a ni. Mahse heti chung hian College hian an thiltih danah dan leh hrai zawm ngai te an zawm lo niin CAG report chuan a tarlang. 

Comptroller and Auditor General of India report chuan July 2019 atanga June 2022 chhunga Government Kolasib College a Professor pariat te hlawh pek danah thil fel hlel a awm nia sawiin an hlawh pek zat inziak leh bank payment a inang lo niin a sawi. Hemi chungchangah hian Principal, Govt. Kolasib College chuan November ni 27,2024 khan chhanna siamin hlawh lak kim loh a awm chhan a sawifiah a. Professor paruk te atangin thla tin Rs. 15,000 leh a dang Professor pahnih atangin thla tin Rs. 20,000 lak (cut) sak an niin hengte hi an aikal te hnenah pek a ni tih a sawi a. 

Mahse thil awmdan kimchang erawh hriattir an ni lo tih sawi bawkin hlawh an cut sak Professor pariat te hi an hlawh cheng vaibelchhe 1.86 chu chawlh la lo leh hnathawk lo chungin pek an ni tih a tarlang bawk. CAG report chuan College thuneitute hian Assistant Professor mi 11 hnenah hian cheng nuai 14.76 a pe tih a tarlang a. College thuneitute hian hetianga thil an tih chhan hi zirlaite hmakhua an ngaih vang leh hlawh an cut sak Professor te remtihna a awm vang niin an sawi a. Mahse CAG chuan dan anga hma la turin sawrkar lam chu an ti a, mahse hmalakna a awm lo niin a tarlang.

CAG in rawtna a siamah chuan hnathawk lo leh phalna la lova thilti te hnena hlawh lo pek hi lak let leh vek nise, Department hian a tul angin dan bawh­chhetute hnenah displinary action la se a tih bakah College hian hna kal, chawlh la leh hlawh lakna record pawimawh te hi tha takin an vawng tur a ni a ti bawk.