ZALEN, May 02, 2025: Haryana-a India rama badminton inelna lian leh ngaihhlut hlawh, Yonex-Sunrise All India Junior Ranking Badminton Tournament 2025-a Mizo inlan zingah H. Lalthazuala chu U-19 Boy’s Singles-ah gold medal lain Mizo zinga ram pum huapa hetiang inelnaa champion hmasa ber a ni a. He inelnaah hian Mizo tleirawl dang pahnihin medal pahnihin silver pahnih leh bronze an la bawk.

Panchkula khawpuia inelnaa a champion rual hian Chanmari West, Aizawl rawlthar, Thazuala hi ram pum huap inelnaa maltana a champion vawi lina a ni ta chiah.

Seeded No. 11 ni chunga inelna hmachhawnin Round of 64-ah Mahendra Kalahasthi lakah game hmasa ber hloh mah se 2-1 (18-21, 21-13, 21-13)-in a hneh a. Round of 32-ah Dhyan Santosh pawh harsatna awm lovin 2-0 (21-17, 21-12)-in a paltlang.

Round of 16-ah Dev Ruparelia lakah game hmasa ber a hloh hnuah 2-1 (21-23, 21-19, 21-10)-in a lehthal a, quarter final-ah India No. 2, tournament-a Seeded No. 2 ni bawk, Pranauv Ram N chu straight set (21-18, 21-15)-a hnehin semifinal a lut.

Final luhna inchuh inkhelah National Games 2025 silver medalist, Suryaksh Rawat (Seeded No. 8) chu straight set (21-14, 23-21) bawkin a hneh leh a. Final-ah hian Seeded No. 3 Ansh Negi nen intumin straight set (21-19, 21-16) bawka hnehin a champion a ni

Thazuala hi Tata Trusts, NEIDA, Mizoram State Sports Council (MSSC) leh Mizoram Badminton Association (MBA) thawhhona hnuaia din, grassroot centre leh Regional Development Centre (RCTC ni ta) chhuak niin Pullela Gopichand Badminton Academy (PGBA), Hyderabad, Telengana-a inzir mek a ni.

Nikum kum tir U-19 Boy’s Singles-ah final thlengin a ke hliam avangin a kheltluan thei lo, a hliam hian tibuaiin result tha pawh a nei hleithei lo reng a. Final a luh lehna hmasa berah erawh Mizoram tan record siamin ram pum huap junior ranking tournament-a mipa maltana champion thei hmasa ber a ni.

Ramsanga’n silver pahnih la

Thazuala’n hming a chher mek lai hian Durtlang rawlthar, huang hniha lut final lut, C. Lalramsanga tan pawh Panchkula inelna hi tournament tha leh chhinchhiah tlak a ni.

Ramsanga hian Under-19 Mixed Doubles-ah Pragati Parida nen inkawpin Seeded No. 2 an ni a. U-19 Boy’s Doubles-ah Bjorn Jaison nen tangdunin Seeded No. 3 niin inelna an hmachhawn, final lut ve vein silver medal a la ve ve.

Mixed Doubles-ah hian Round of 32 atanga semifinal thlengin straight set vekin an chak a, an tumpuiten an khan lo hle a. Final-ah Seeded No. 7 Bornil Akash Changmai leh Zennith Abbigail te inkawp hmachhawnin game hmasa ber la mah se a vanduai zawkah an tang a, 21-17, 21-23, 19-21-in an chak lo.

Boy’s Doubles-ah thung chuan Round of 32 atanga semi final thleng deciding game hmangin an chak a, final-ah hian Seeded No. 1 Vishnu Kedhar Kode leh Mithileish P. Krishnan nen intumin deciding game-ah 15-21, 22-20, 17-21-a chak lovin silver medal an la bawk.

Tata Trusts leh MBA thawhhonaa PGBA-a awm thin, Ramsanga hi Mizo zingah ram pum huap junior ranking tournament pakhata huang hniha final thleng thei awmchhun a ni a. Tunah hian National Centre of Excellence, Guwahati, Assam-ah a la inzir chhunzawm mek. 

Rempuii’n bronze hlap chhuak bawk

Serchhip tleirawl, Lalrempuii pawhin huang hnihah inelna hmachhawnin Girl’s Doubles-ah Tanoo Chandra-i nen bronze medal an la.

Seeded No. 2 nia inelna hmachhawnin Girl’s Doubles-ah hian final thleng ngei tura ngaih an nih laiin semi final-ah an hnen fo tawh, Taarini Suri leh Shravani Walekar (Seeded No. 4) te lakah chesualin bronze medal an dawn a ngai ta a ni.

Panchkula-a inelnaah hian Sainunmawia Sailo leh a kawppui, Aksh Singh te chu qualifying atanga bul tannin quarter final an thleng a, an kalkawngah Seeded No. 2 pawh an vaw thla nghe nghe.

Malsawmhlua leh a kawppui, Girivasan Saravana Kumar te pawhin qualifying round atanga bul tanin quarter final an thleng bawk a, Seeded No. 1 leh he tournament-a champion zui ta lakah an tlawm a ni.

MBA chuan ram pum huap inelnaa an naute an chet tha chu an lawmin an phur hle tih an sawi a. Medal latute an lawmpuiin an kal zelna turah duhsakna an hlan a. Badminton-in hma a sawn theih nana an thawhpui, TATA Trusts, NEIDA, PGBA te leh MSSC te chungah pawh lawmthu an sawi bawk.