ZALEN July 27, 2026: Chief Minister Lalduhoma chuan vawiin khan ZMC&H, Falkawn a tlawh a, Health Minister Lalrinpuii leh Adviser to CM TBC Lalvenchhunga ten an tawiawm. CM chuan hnathawh that avangin sum dawn a nih tur thu a sawi.

Chief Minister chuan, 6th Finance Commission hun chhung hian sawrkar laipui chuan Financial Assistance to states/UTs for Public Health Infrastructure (FASPHI) scheme a kalpui dawn a. 2026-27 chhung atan Rs. 4200 crore a dah hrang a, Mizoram chuan Rs. 120 Crore a chang ve dawn a ti. 

He scheme-ah hian indicator – 4 (pali) – (1) Infant mortality rate (IMR), (2) Maternal mortality ratio (MMR), (3) Tuberculosis mortality rate (TB-MR), leh (4) damdawiin (sub-centre te tiamin) National quality assurance standards (NQAS) certify zat – te hmanga state ten lawmman an dawn tur hi chhut a ni. 

Mizoramin lawmman (incentive) a dawnna indicators te chu – IMR leh NQAS certified damdawiin neih tam (percentage of health facilities that are NQAS certified) te an ni a. IMR hi 2023-ah 13 (naupiang 1000 zela 13 thi) niin 2024-ah 12 a tlakhniam avangin Rs. 20 crore incentive dawn a ni a.

NQAS certified damdawiin te hi 2024-25 atanga 2025-26 a a punna hi 21.07% a nih avangin Rs. 100 crore incentive dawn a ni a. Hei hi a dawn theih sang ber a ni. 

Ministry of Health & Family Welfare (MoHFW) atangin claim tur zat hi an rawn hrilh tawh a. Rs. 120.00 crores man hu project proposal thehluh tawh niin MoHFW hian a pawmsak tawh a ni. MoHFW hian July thla ral hmain proposal-te hi Ministry of Finance ah a thehlut dawn a ni,” a ti.

He Scheme atanga Mizorama hnathawh tur project approve tawhte leh a thawhna zat turte a tarlang nghal a, chungte chu:

1. Upgradation of Sakawrdai non-first referral unit (non-FRU) - community health centre (CHC) to a FRU-CHC, Project Cost Rs. 20,43,97,000.00

2. Upgradation of Kawrthah non-first referral unit (non-FRU)- community health centre (CHC) to a FRU-CHC, Project Cost Rs. 20,80,08,000.00

3. Upgradation of West Phaileng non-first referral unit (non-FRU)- community health centre (CHC) to a FRU-CHC, Rs. 20,80,08,000.00

4. Upgradation of Bungtlang South non-first referral unit (non-FRU)- community health centre (CHC) to a FRU-CHC, Project Cost Rs. 21,53,37,000.00

5. Establishment of Infectious Diseases Ward at Lunglei District Hospital, Project cost Rs. 3,82,45,100.00

6. Establishment of Infectious Diseases Ward & Tuberculosis Treatment Unit at Kulikawn Sub-District Hospital, Aizawl, Project Cost Rs. 6,36,42,400.00

7. Establishment of Infectious Diseases Ward at Lawngtlai District Hospital, Project Cost Rs. 3,84,55,205.00

8. Procurement of equipment for strengthening of Tuberculosis diagnosis in Mizoram, Project Cost Rs. 1,54,20,000.00

9. Equipment for Maternal & Child Care at various levels of health facilities, Project cost Rs. 20,84,87,295.00

Chief Minister chuan, hnathawh that vanga lawmman (incentive) dawn thin hi a lawmawm a, hmalakna tur dik taka kut thlak thin tilangtu a ni a, a chhuanawm a ni, tiin Health Minister Lalrinpuii leh H&FW Department-a a thawktute chungah lawmthu a sawi a ni. Chief Minister hian ZMC&H hmunhmate a fang a, an mamawhte a hmunah a enpui nghal a ni.