ZALEN, August 27, 2025: Heyball bika No. 5 a hauh thar leh nen Lalrina Renthlei chu dawhkana ball hawlh infiamna (cue sport) chi hrang pali-ah India Top 10-ah a lang phak ta vek.

Lalrina hi Thawhtannia khelh zawh tak, 1st NSCI Heyball National Championship 2025-ah nomawi la pha lo mah se ranking match-ah che tha zuiin India No. 5 a ni ta.

Mizoram Snooker & Billiards Association (MSBA) player hi August 17-26 chhunga Delhi-a 1st National Sports Club of India (NSCI) Heyball National Championship 2025-ah quarterfinal a lut phak a, Mizo player pasarih inlan zinga a thleng sang ber a ni.

Quarterfinal hi Thawhtanni zan khan Sundeep Gulati, Delhi nen khelin 9-6-in a tlawm zawkah a tang a, a hneh loh hi a champion zui nghe nghe.

Thawhlehni khan ranking match an khel zui a, Delhi player Avinash Kumar leh Petroleum Sports Promotion Board (PSPB) player Shabaaz Adil Khan te chu 5-2 ve vea hnehin India Heyball Rank No. 5 a ni thei ta a ni.

Tuikhuahtlang, Aizawla cheng, Lalrina hi India rama cue sport chi li-ah Top 10 a kai ta vek a. Pool 9 Ball-ah No. 4, 10 Ball-ah No. 5 leh Snooker-ah No. 9 ni sain Heyball-ah No. 5 a ni phak leh ta a ni.

Lalrina hi October thlaa World 8 Ball Pool Championship, Bali, Indonesia-a khel thei tura tih a ni a; mahse, a tel thei dawn lo thung.

Cue sports inelna zinga mi, Heyball an tih khelhna dawhkan hi Mizorama la awm lo a ni a, pool khelhna nen intiat deuh reng mah se a luhna kua a zim zawk a, a ball pawh pool ball a laia hawlh tlang (diameter) mm 52.5 chu mm 57 daih a ni bawk.

Delhi-a inelnaa telte pawh hi Mizoramah a dawhkan a la awm loh avangin an inbuatsaih lawk thei lo va, heti chunga a vawi khat nana ram pum huap intihsiaka an telnaa Mizo player-te thlen chin hi a hniam lo hle nia ngaih a ni a. Heyball pool khelhna tur dawhkanah rual an awt hle niin a hmuna awmte chuan an sawi.